Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 152 Hüküm no: 107 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule’de Bahçıvan Kostandi’nin satın aldığı bahçe gediğine ait yanan hüccetinin yenilenmesi İstihbâr-ı gedik Mahmiye-i İslâmbol hısnı ebvâbından Yedikule hâricinde mütemekkin bağçevân tâifesinden işbu hâmilü’r-rakīm Kostandi v. Peratmoz nâm zimmî meclis-i şer‘-i şerîf-i enverde takrîr-i kelâm ve bast-ı merâm edip hısn-ı mezbûr cidârı hâricinde Tokat ta‘bîr olunur nâm mahâlden Kapılı kapı üst tarafında Aci Petro nâm zimmî sandığına varınca Ortayerin sandığı demekle arîf sandık derûnunda mevcûd beyne’l-hıref gedik ta‘bîr olunur beş yüz aded incir eşcârı ve iki yüz aded erik eşcârı ve üç yüz dip engi[n]âr fidanı ve sâir âlât-ı lâzıme-i ma‘lûme ve mârrü’z-zikr tokat altında kâin bir kıt‘a nânelik derûnunda mevcûd ma‘lûmü’l-mikdâr nâne fidanı ve Silivrikapısı hâricinde sol tarafında kâin dördüncü yerin sandığı derûnunda mevcûd nânelik derûnunda mevcûd kezâlik ma‘lûmü’l-mikdâr nâne fidanı dört sehm i‘tibârıyla Peratmoz ve Eci Sanya ve Praşkova ve Abraham evlâd-ı Ezraya nâm zimmîlerinin ale’l-iştirâki’s-seviyy yedlerinde mülkleri iken merkūm Eci Sanya zimmî mârrü’z-zikr gedik ta‘bîr olunur eşcâr ve enginâr ve nâne fidanı ve sâir âlât-ı lâzıme-i ma‘lûmede i‘tibâr-ı merkūm üzere olan bir sehmini işbu sene-i mübâreke Şa‘bâni’l-mu‘azzamının on beşinci günü altı yüz seksen guruş semen-i medfû‘ ve makbûza safka-i vâhide ile bâ-hüccet-i şer‘iye bana bâtten bey‘ ve temlik ve teslîm ve ben dahi ber-vech-i muharrer iştirâ ve temellük ve tesellüm ve kabûl edip ol-vechile mârrü’z-zikr gedik ta‘bîr olunan eşcâr ve enginâr ve nâne fidanları ve sâir âlât-ı lâzıme-i ma‘lûmenin rub‘ hissesi benim mülk-i müşterâm olup lâkin yedimde olan hüccetim bunda[n] ak[de]mce vâki‘ olan harîk-i kebîrde muhterik olup rub‘ hisse-i mezkûre mülk-i müşterâm olduğunu müş‘ir yedimde hüccetim olmamağla takrîrim vukūf-ı tammı olan kimesnelerden suâl ve istihbâr ve haberleri zabt ve tahrîr ve kıbel-i şer‘den hüccet olunup yedime i‘tâ olunmak matlûbumdur dedikde fi’l-hakīka hâl-i mukırr-ı merkūm Kostandi zimmînin bi’l-cümle takrîr-i meşrûhu üzere olduğunu Molla Ali b. Halil ve el-Hâc Hasan b. Osman ve Ali Ağa b. Mustafa nâm kimesneler ile Yiğitbaşı Sava v. Sünbül ve Praşkova v. Ananya ve Peratmoz v. Kiryako ve Todori v. Rüstem ve diğer Peratmoz v. Abraham ve Yuvakim v. Toros nâm zimmîlerden herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 27 Za sene 1196 Şühûdü’l-hâl: Molla Ali b. Halil, Salih b. Halil, Hacı Hasan b. Osman.