.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 209
Hüküm no: 163
Orijinal metin no: [45b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hurşid Ağa’nın halası Nazife Hatun aleyhindeki davasının kabul olunmaması

Ma‘rûz,

Asâkir-i muntazama-i Şâhâne kolağalarından sâhib-i arzuhâl Hurşid Ağa b. Abdullah Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde mezbûr Hurşid Ağa’nın hâletesi olup medîne-i Üsküdar’da Küçükyokuş mahallesinde sâkine derûn-ı arzuhâlde mezkûretü’l-ism mu‘arrefetü’z-zât Hâce Nazife Hatun bt. Abdullah muvâcehesinde kezâlik mu‘arrefetü’z-zât Şerife Âişe Sıdıka Hatun bt. el-Hâc Hasan hâzıra olduğu hâlde ben bin iki yüz elli altı senesi hilâlinde teehhül etmek murâd eylediğim esnâda hâletem mezbûre Hâce Nazife Hatun velîme husûsu için her ne mikdâr akçe sarf olunması lâzım gelir ise sana rücû‘ şartıyla hâzıra-i mezbûre emriyle malından sarf etsin ba‘dehu ne mikdâr bi’l-mürâca‘a alacağı zuhûr eder ise hâzıra-i mezbûre Şerife Âişe Sıdıka hatuna ben senin için def‘aten veririm, ba‘dehu sen bana ceste ceste edâ eyle demekle ben dahi hâzıra-i mezbûre Şerife Âişe Sıdıka Hatun’a vech-i meşrûh üzere emreylediğimde hâzıra-i mezbûre dahi ber-vech-i muharrer husûs-ı mezkûra malından üç bin dokuz yüz guruş harc ü sarf etdikden sonra meblağ-ı mezkûrun bin beş yüz yirmi beş guruşunu mukaddemâ hâzıra-i mezbûreye ceste ceste edâ ve teslîm etmemle bâkīsi olan iki bin üç yüz yetmiş beş guruşunu hâzıra-i mezbûre Şerife Âişe Sıdıka Hatun akdemce benden bi’l-mürâca‘a da‘vâ ve kendüye hâlâ edâ etmek üzere bâ-i‘lâm-ı şer‘î hükm etdirmiş idi. Ancak benim meblağ-ı mahkûmün-bih-i bâkī-i mezkûru hâlen def‘aten hâzıra-i mezbûreye bir vechile edâya iktidârım olmadığına ve mücerred hâletem mezbûre Hâce Nazife Hatun’un târîh-i mezkûrda bana velîme husûsu için sana her ne mikdâr akçe sarf olunması lâzım gelir ise sana rücû‘ şartıyla emreyle malından sarf etsin ba‘dehu ne mikdâr alacağı zuhûr eder ise hâzıra-i merkūme Şerife Âişe Sıdıka Hatun’a senin için def‘aten veririm, ba‘dehu sen bana ceste ceste edâ eyle dediğine binâen meblağ-ı mahkûmün-bih-i bâkī-i mezkûr iki bin dört yüz yetmiş beş guruşu benim için hâzıra-i mezbûre Şerife Âişe Sıdıka Hatun’a hâlen ba‘de’l-edâ benden ber-minvâl-i muharrer ceste ceste ahz u kabza hâletem mezbûre Hâce Nazife Hatun’a cebr olunsun deyü takrîr-i meşrûhu üzere tasaddî eylediği da‘vâsı mesmû‘a ve iltifâta şâyân olmadığı müdde‘î-i merkūm Mehmed Hurşid Ağa’ya tefhîm ve da‘vâ-yı mezkûresiyle hâletesi mezbûre Hâce Nazife Hatun’a bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr.

Fî 28 M sene [12]57.