Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 158 Hüküm no: 116 Orijinal metin no: [17b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne Gümrük Kâtibi iken vefat eden Hüseyin Efendi’den küçük oğlu Ahmed Arif Molla’ya miras kalan evin vasisi tarafından Şerife Hadice’ye satılması Bâ-izn-i vasî menzili bey‘ Mahmiye-i İslâmbol’da Sultan Selim Câmi‘-i şerîfi kurbünde Cebecibaşı mahallesi ahâlisinden olup mahrûse-i Edirne’de gümrük kâtibi iken bundan akdem irtihâl-i dâr-ı bekā eden Hüseyin Efendi b. Hasan nâm kimesnenin verâseti ancak sulbî sagīr oğlu Ahmed Ârif Molla’ya münhasıra olduğu tahakkukundan sonra sagīr-i mezbûrun tesviye-i umûrunu rü’yete bâ-hüccet-i şer‘iye mansûb vasîsi olan Mehmed Mahir Efendi b. Abdullah tarafından vech-i âtî üzere bey‘a ve kabz-ı semene vekîl olduğu Hafız Mehmed Efendi b. Ali ve Hüseyin Efendi b. Mustafa nâm kimesneler şehâdetleriyle sâbit olan [18a] Uncuzâde Mehmed Emin Efendi b. Mahmud nâm kimesne meclis-i şer‘-i hatîr-i lâzımü’t-tevkīrde zâtı vech-i şer‘î üzere mu‘arrefe olan işbu bâ‘isetü’l-vesîka Şerife Hadice bt. Mehmed Emin mahzarında bi’l-vekâle ikrâr-ı tam ve takrîr-i kelâm edip mahalle-i mezbûrede vâki‘ bir tarafdan Haffâf zevcesi Âişe Hatun menzili ve bir tarafdan Dürrîzâde Efendi menzili ve bir tarafdan Natur Mehmed Beşe menzili ve bir tarafdan tarîk-i âm ile mahdûd arsası merhûme Hüma Hâ[tu]n Vakfı’na senevî seksen akçe mukāta‘alı ve üzerinde mevcûd ebniye ve müştemilât-ı ma‘lûmesi mülk olan bir bâb harâb menzilin ebniye-i mevcûde ve müştemilât-ı ma‘lûmesi müteveffâ-yı mezbûr Hüseyin Efendi’nin hayatında ile’l-vefât yedinde mülkü ve arsası dahi bâ-ma‘rifet-i mütevellî taht-ı tasarrufunda olup ba‘de vefâtihî ancak müvekkilim mezbûr Mehmed Mahir Efendi’nin vasîsi olduğu sagīr-i mezbûr Ahmed Ârif Molla’ya mevrûs ve isâbet edip lâkin menzil-i mahdûd-ı mezkûr mürûr-ı eyyâm ile müşrif-i harâb ve mâil-i türâb olup hâsılı harcına vefâ etmeyip bekāsı sagīr-i mezbûra muzır olmağla menzil-i mezkûr semen-i misli ve bâ-ma‘rifet-i mütevellî âhara bey‘ ve kabz-ı semen olunup sagīr-i mezbûr içün hıfz olunmak sagīr-i mezbûr hakkında evlâ ve enfa‘ olduğunu zeyl-i kitâbda muharrerü’l-esâmî Müslimîn meclis-i şer‘a ihbâr ve müvekkilim vasîyy-i mezbûr Mehmed Mahir Efendi kıbel-i şer‘den mezûn oldukdan sonra menzil-i mezkûr bey‘a arz ve müzâyede olunup rağabât-ı nâs munkatı‘a oldukdan sonra mezbûre Şerife Hadice Hanım üzerinde iki yüz guruşa karâr ve ziyâde ile tâlib-i âharı zuhûr etmeyip ve meblağ-ı merkūm iki yüz guruşu menzil-i mezkûrun semen-i misli idiğini Müslimûn-ı merkūmûn ihbâr etmeleriyle ben menzil-i mahdûd-ı mezkûrun ebniye ve müştemilât-ı ma‘lûme-i memlûkesini tarafeynden îcâb ve kabûlü hâvî bey‘-i bâtt-ı sahîh-i şer‘î ile semen-i misli idiği ihbâr olunan meblağ-ı merkūm iki yüz guruşa mezbûre Şerife Hadice Hanım’a bi’l-vekâle bey‘ ve temlik ve teslîm ve arsasını bâ-ma‘rifet-i mütevellî meccânen ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semen-i merkūm iki yüz guruşu mezbûre Şerife Hadice Hanım yedinden bi’l-vekâle bi’t-tamam ve’l-kemâl ahz ü kabz eyledim, fîmâ-ba‘d menzil-i mahdûd-ı mezkûrda müvekkilim mezbûr Mehmed Mahir Efendi’nin vasî olduğu sagīr-i mezbûr Ahmed Ârif Molla’nın aslâ alâka ve medhali kalmayıp mezbûre Şerife Hadice Hanım’ın mülk-i müşterâsı ve dâhil-i havza-i tasarrufu olmuşdur dedikde gıbbe’t-tasdîk. Fî 3 min-Zilhicce sene 1196 Şühûdü’l-hâl: Mevâlî-i i‘zâmdan Şeyhzâde Sunullah Efendi b. Abdurrahim Efendi, Sultan Selim Câmi‘-i şerîfi imâmı es-Seyyid Osman Efendi b. es-Seyyid Ahmed, Mustafa Efendi b. Mehmed Efendi, es-Seyyid Mehmed Şakir Efendi b. Salih Efendi ve gayruhum.