Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 159 Hüküm no: 117 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hanım’ın Cebecibaşı mahallesindeki evde olan hissesini diğer hissedar Anadolu Kalemi Başhalifesi Mustafa Efendi’ye satması Menzilden hisse mübâya‘ası Husûs-ı âti’l-beyânın mahâllinde ketb ü tahrîri iltimâs olunmağın bu fakīr mahmiye-i İslâmbol’da Çarşamba Pazarı kurbünde Koğacı Dede mahallesinde kâin hâlâ Anadolu Kalemi başhalîfesi umdetü erbâbi’t-tahrîr ve’l-kalem zübdetü’t-tastîr ve’r-rakam sa‘âdetlü Mustafa Efendi b. Mehmed Efendi’nin sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr etdikde mahmiye-i mezbûrede Cebecibaşı mahallesinde kâin bir tarafdan eşrâf-ı kuzâtdan Arabzâde kerîmesi menzili ve bir tarafdan Nefise Hatun arsası ve iki tarafdan tarîk-i âm ile mahdûd dâhilen ve hâricen büyût-ı adîde ve müştemilât-ı sâire-i ma‘lûmeyi hâvî bir bâb mülk menzil iki yüz sehm i‘tibârıyla yüz otuz yedi sehmi mûmâ-ileyh Mustafa Efendi’nin yedinde mülkü ve kırk iki sehmi Mehmed Tâhir Efendi ve yirmi bir sehmi Rukiye Hanım evlâd-ı Ahmed Efendi’nin yedlerinde mülk-i mevrûsları olduğu lede’ş-şer‘i’l-enver zâhir oldukdan sonra mûmâ-ileyhâ Rukiye Hanım meclis-i ma‘kūd-ı mezkûrda bâ‘isü hâze’l-kitâbi’l-müstetâb mûmâ-ileyh Mustafa Efendi mahzarında ikrâr-ı tam ve takrîr-i kelâm edip ben bâlâda tahdîd ve tavsîf olunan menzil-i mezkûrda olan i‘tibâr-ı merkūm üzere mülküm olan yirmi bir sehm hisse-i irsiye-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh Mustafa Efendi’ye iki yüz on guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm iki yüz on guruşu mûmâ-ileyh Mustafa Efendi yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrda i‘tibâr-ı merkūm üzere olan yirmi bir sehmde benim aslâ alâka ve medhalim kalmayıp mûmâ-ileyh Mustafa Efendi’nin mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb. Fî 7 min-Zilhicceti’ş-şerîfe sene 1196 Şühûdü’l-hâl: Mevâlî-i i‘zâmdan sâbıkā Kayseriye kādısı Sunullah Efendi, es-Seyyid Ahmed Besim Efendi b. Ahmed Efendi, es-Seyyid Mehmed Şakir Efendi b. Salih Efendi, Uncuzâde Mehmed Emin Efendi b. Ahmed Efendi ve gayruhum.