Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 210 Hüküm no: 164 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Mehmed’in boşandığı eşi Numan Ağa’dan olan oğlu Hüseyin için nafaka talebi Ma‘rûz, Sâhibe-i arzuhâl mu‘arrefetü’z-zât Fâtıma bt. Mehmed nâm hatun Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde zevc-i sâbıkı medîne-i Üsküdar’da Doğancılar mahallesinde sâkin derûn-ı arzuhâlde mezkûretü’l-ism Numan Ağa b. Hüseyin nâm kimesne muvâcehesinde mezbûr Numan Ağa ile mukaddemâ zevciyyet beynimizde kāime iken mezbûrun firâşından hâsıl ve benden mütevellid bi-hakkı’l-hıdâne hâlâ hacr ve terbiyemde olan sulbî oğlu işbu hâzır bi’l-meclis Hüseyin nâm sagīrin beher şehr otuzar guruş nafaka-i mukaddere-i mefrûza-i müstedânesinden bin iki yüz elli altı senesi şehr-i Rebî‘ülahiri’nin yirmi dördüncü gününden işbu târîh-i i‘lâm-ı şehrînin yirmi dördüncü gününe gelince dokuz ay müddetde müctemi‘ olan iki yüz yetmiş guruşu mezbûr Numan Ağa’dan bi’l-mürâca‘a hâlâ taleb ederim deyü da‘vâ etdikde mezbûr Numan Ağa dahi cevâbında kaziyye minvâl-i muharrer üzere olduğunu bi-tamâmihâ ikrâr ü i‘tirâf etmeğin, alâ-mûceb-i i‘tirâfihî meblağ-ı mecmû‘-ı mezkûr iki yüz yetmiş guruşun müdde‘iyye-i mezbûre Fâtıma Hatun’a edâ ve teslîmiyle mezbûr Numan Ağa ilzâm olunduğu huzûr-ı âlîlerine i‘lâm olundu. El-emru li-men-lehü’l-emr. Fî 27 M sene [12]57.