Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 160 Hüküm no: 118 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evhaddin mahallesinden Musa Odabaşı’nın bazı eşyalarını hanımına satması Eşyâ mübâya‘ası Mahmiye-i İslâmbol’da el-Hâc Evhaddin mahallesinde sâkin Musa Odabaşı b. Mahmud nâm kimesne tarafından vekîl olduğu Mehmed Efendi b. Mustafa ve el-Hâc Mahmud b. Ahmed nâm kimesneler şehâdetleriyle sâbit olan Mehmed b. el-Hâc Mustafa nâm kimesne meclis-i şer‘-i şerîf-i enverde müvekkil-i mezbûrun hâlâ zevcesi mu‘arrefetü’z-zât işbu bâ‘isetü’l-kitâb Âişe bt. Abdullah nâm hatun mahzarında bi’l-vekâle ikrâr-ı tam ve takrîr-i kelâm edip müvekkilim mezbûr eşyâ-i memlûkesinden bâ-defter-i müfredât yün memlû on beledî yasdık ve dört minder ve dört çit mak‘ad ve iki yemeni yorgan bâ-çârşeb ve üç köşe yasdığı ve iki tencere ma‘a kapak ve üç sahan ma‘a kapak ve bir tâbe ve bir kadayıf tepsisi ve bir leğen ma‘a ibrik ve bir kahve ibriği ve bir sagīr sini ve bir Mısır hasırı ve bir pirinç şam‘dânını tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcesi mezbûre Âişe Hatun’a yirmi guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mütâlebesinden müvekkilim mezbûr Musa Odabaşı zevcesi mezbûre Âişe Hatun’un zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre mezbûre Âişe Hatun’un mülk-i müşterâsı ve hakk-ı sarfı olup müvekkilim mezbûr Musa Odabaşı’nın kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 8 min-Zilhicceti’ş-şerîfe sene 1196 Şühûdü’l-hâl: İmâm Nimetullah Efendi b. Mustafa, Müezzin Ömer Efendi b. Osman, Mehmed Efendi b. Mustafa, el-Hâc Mahmud b. Ahmed, Mehmed Beşe b. Hüseyin, Mehmed Ağa b. el-Hâc Mustafa, Tâcir Hüseyin Ağa b. Abdullah ve gayruhum.