.:: İstanbul Kadı Sicilleri ::.


Davud Paşa Mahkemesi 1 Numaralı Sicil (H. 1196-1197 / M. 1782-1783)
cilt: 79, sayfa: 160
Hüküm no: 119
Orijinal metin no: [18b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Evhaddin mahallesinden Musa Odabaşı’nın vasiyeti

Vasiyet

Mahmiye-i İslâmbol’da el-Hâc Evhaddin mahallesinde sâkin Musa Odabaşı b. Mahmud nâm kimesne tarafından vech-i âtî üzere vekîl olduğu Mehmed Efendi b. Mustafa ve el-Hâc Mahmud b. Ahmed nâm kimesneler şehâdetleriyle sâbit olan Mehmed b. el-Hâc Mustafa nâm kimesne meclis-i şer‘-i şerîf-i enverde işbu bâ‘isü’l-vesîka Mustafa Efendi b. Halil mahzarında bi’l-vekâle ikrâr-ı tam ve takrîr-i kelâm edip müvekkilim mezbûr Musa Odabaşı şöyle vasiyet eyledi ki, ben bi-emrillâhi te‘âlâ vefât eylediğimde mezbûr Mustafa Efendi benim vasîyy-i muhtârım olup mecmû‘ terekemi bi’l-vesâye ahz ü kabz eyledikden sonra evvelâ sünnet-i seniyye üzere levâzım-ı techîz ve tekfînime terekemden otuz guruş harc ü sarf eyleye ve hâlâ zevcem Âişe bt. Abdullah nâm hatuna zimmetimde ma‘kūdun-aleyh olan elli guruş mehr-i müeccelini ba‘de’l-edâ bâkī kalan terekemin sülüsünü ifrâz ve sülüs-i mezbûrdan otuz guruş ıskāt-ı salât-ı fâitem ve on guruş keffârât-ı yemîn ve savmım içün fukarâ-i Müslimîn beyninde devr ve tasadduk oluna ve yine sülüs-i mezbûrdan on guruşa iki aded küfegi taş iştirâ ve alâmet içün merkadimin baş ve ayak câniblerine vaz‘ ve nasb oluna ve yine sülüs-i mezbûrdan beş guruş helva tabh olunup it‘âm-ı fukarâ oluna ve yine sülüs-i mezbûrdan on beş guruş hediyeli bir Mushaf-ı şerîf iştirâ ve vakfiyet üzere talebe-i ulûmdan bir müstahak kimesneye verile ve sülüs-i mezbûrdan her ne kalır ise vasîyy-i mezbûr kendi nefsi içün ahz ü kabz eyleye ve sülüsân terekemden zevce-i mezbûre Âişe Hatun ile vilâyet-i Anadolu’da Gerede kazâsında sâkin ammim oğlu ( ) nâm kimesnenin hisse-i irsiyelerini dahi îsâl ve teslîm eyleye deyü vasiyet ve tenfîzine mezbûr Mustafa Efendi’yi vasîyy-i muhtâr nasb u ta‘yîn eyledim dedi dedikde ol dahi ber-vech-i muharrer vesâyet-i mezkûreyi kabûl ve hizmet-i lâzımesin kemâ-yenbağī edâya ta‘ahhüd ve iltizâm etmeğin mâ-vaka‘a bi’t-taleb ketb olundu.

Fî 8 min-Zilhicceti’ş-şerîfe sene 1196

Şühûdü’l-hâl: Şâhidûn-ı sâbıkūn.