Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 162 Hüküm no: 121 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Zeliha bt. Abdullah’ın bakmakta olduğu küçük kızı için boşandığı kocasından nafaka alması Gāib üzerine nafaka Mahmiye-i İslâmbol’da İskender Ağa mahallesinde sâkine takrîben iki yaşında olan Şerife Fatıma nâm sagīrenin vâlidesi ve hâdinesi olup zâtı vech-i şer‘î üzere mu‘arrefe olan işbu bâ‘isetü’l-kitâb Zeliha bt. Abdullah nâm hatun meclis-i şer‘-i şerîf-i enverde takrîr-i kelâm ve ifâde-i merâm edip zevc-i mutallıkım olan gāib ani’l-beled Dikici es-Seyyid Mehmed b. Abdullah nâm kimesnenin firâşından hâsıla ve benden mütevellide ve hâlâ bi-hakkı’l-hıdâne hacr u terbiyemde olan sadriye kızım sagīre-i mezbûre Şerife Fatıma’nın kendüyü infâk eder mâlı olmayıp babası gāib-i mezbûr es-Seyyid Mehmed dahi kızım sagīre-i mezbûreyi bilâ-nafaka ve lâ-münfik-i şer‘î terk ve diyâr-ı âhara gidip nafaka cinsinden nesne bırakmayıp ve irsâl dahi etmemeğin ol-vechile kızım sagīre-i mezbûre nafaka ve kisveye muhtâce olmağla kızım sagīre-i mezbûrenin nafaka ve kisvesi içün babası mezbûr üzerine kıbel-i şer‘den kadr-ı ma‘rûf meblağ farz ve takdîr ve istidâneye izin verilmek bi’l-hıdâne matlûbumdur dedikde hakīkat mukırre-i mezbûrenin bâlâda bast ü beyân ve şerh ü ayân eylediği minvâl üzere olup ve zikri âtî meblağ gāib-i mezbûrun vüs‘-ı hâline nisbetle kadr-ı ma‘rûf idiği zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir oldukdan sonra hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin nafaka ve kisvesi içün babası zevc-i mutallıkım gāib-i mezbûr es-Seyyid Mehmed üzerine [19a] târih-i kitâbdan küllü yevm dörder para farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-hâce istidâneye ve inde’z-zafer babası gāib-i mezbûr es-Seyyid Mehmed üzerine rücû‘a mezbûre Zeliha Hatun’a izin vermeğin mâ-hüve’l-vâki‘ bi’t-taleb ketb olundu. Fî 7 Zilhicce sene 1196 Şühûdü’l-hâl: Derviş Mehmed b. el-Hâc Salih, Ali Beşe b. Osman, Molla Ali b. Halil, Salih b. Halil.