Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 163 Hüküm no: 122 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Zeyneb bt. Abdullah’ın kocasına mehrini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Koca Mustafa Paşa kurbünde Canbaziye mahallesinde sâkine Zeyneb bt. Abdullah nâm hatun tarafından vech-i âtî üzere vekîl olduğu zât-ı mezbûreyi ârifân Mehmed b. Ali ve Osman b. Ali nâm kimesneler şehâdetleriyle sâbit olan Hasan Ağa b. Süleyman nâm kimesne meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb Mehmed b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûr[e] Zeyneb Hatun zevci mezbûr Mehmed zimmetinde ma‘kūdun-aleyh olan on sekiz guruş mehr-i müeccelinin üç guruşunu zevci mezbûr Mehmed zimmetinde ba‘de’l-ibkā ma‘a on beş guruşunu hibe-i sahîha-i şer‘iye ile târih-i kitâbdan iki ay mukaddem zevci mezbûr Mehmed’e hibe ve temlik eylediğinde ol dahi ber-vech-i muharrer ittihâb ve temellük ve kabûl eyledikden sonra eşyâ-i memlûkesinden bâ-defter-i müfredât beş beledî yasdık ve üç minder ve üç baş yasdığı ve beş yorgan bâ-çârşeb ve bir beledî döşek ve bir beyaz döşek ve iki döşek çârşebi ve bir çuka ferâce ve bir Şam alacası entari ve bir kedi kürkü ve üç gömlek ve bir köhne hırka ve bir çiçekli entari ve bir kırmızı bilek ve bir mâî bilek ve dört sahan ma‘a kapak ve iki tencere bâ-kapak ve bir kadayıf tepsisi ve bir tâbe ve bir leğen ma‘a ibrik ve bir güğüm ve bir hamam rahtı tahta ve sepet iki sandık ve bir şamdanını dahi yine târih-i mezbûrda tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr Mehmed’e kırk guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr kırk guruş mutâlebesinden zevci mezbûr Mehmed’in zimmetini ibrâ ve ıskāt eylediğinde ol dahi ibrâsını kabûl etmeğin ol-vechile mehr-i mezkûr on sekiz guruşun on beş guruşundan zevci mezbûr Mehmed’in zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Zeyneb Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 min-Zilhicceti’ş-şerîfe sene 1196 Şühûdü’l-hâl: Es-Seyyid İsmail Efendi b. Ali el-İmâm, Halil Efendi b. İbrahim, el-Hâc Ahmed b. Mehmed, es-Seyyid Mehmed Beşe b. Ali, Memiş Beşe b. Süleyman, Osman b. Ali, Molla Ali b. Halil ve gayruhum.