Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 164 Hüküm no: 123 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Fatma Hatun’un kocasına mehri ile ziynet eşyalarını hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da İskender Ağa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fatıma Hatun bt. İbrahim meclis-i şer‘-i hatîr-i lâzımü’t-tevkīrde hâlâ zevci işbu bâ‘isü’l-vesîka Selim Ağa b. Abdullah nâm kimesne mahzarında ikrâr ve takrîr-i kelâm edip zevcim mezbûr Selim Ağa zimmetinde ma‘kūdun-aleyh olan altı bin akçe mehr-i müeccelim ile bir çift altın bilezik ve bir çift altın kuşak ve iki altın yüzük ve bir çift sîm kuşağımı hibe-i sahîha-i şer‘iye ile târih-i kitâbdan iki ay mukaddem zevcim mezbûr Selim Ağa’ya hibe ve temlik ve teslîm eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i sâire-i memlûkemden yün memlû çatma ve beledî on sekiz yasdık ve dört minder ve iki döşek ve altı şilte ve altı yorgan ma‘a çârşeb ve def‘a bir yorgan ve iki bilek ve bir orta keçesi ve iki kilim ve def‘a dört minder ve üç Mısır hasırı ve sekiz çârşeb ve dört baş yasdığı ve bir çiçekli entari ve bir Şam alacası entari ve bir Ankara şalisi entari ve bir beyaz entari ve bir şali cübbe ve bir şalvar ve bir don ve bir çuka ferâce ve bir şalî ferâce ve üç boğça ve kırk zirâ‘ iplik ve iki sepet sandık ve beş tencere bâ-kapak ve on sahan bâ-kapak ve iki kazgan ve üç lenger ve dört sini ve iki güğüm ve bir musluklu güğüm ve iki leğen ve üç ibrik ve iki mankāl ve üç çorba tası ve bir saplı ayak ve def‘a iki tas ve bir kahve ibriği ve dört şamdanımı yine târih-i mezbûrda tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Selim Ağa’ya iki yüz elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz elli guruş mütâlebesinden dahi zevcim mezbûr Selim Ağa’nın zimmetini ibrâ ve ıskāt eylediğimde ol dahi ibrâmı kabûl etmeğin ol-vechile mehr-i mezkûr altı bin akçeden târih-i mezbûrdan beri zevcim mezbûr Selim Ağa’nın zimmeti berî ve zikr olunan bilezik ve kuşaklar ve yüzük zevcim mezbûr Selim Ağa’nın mülk-i mevhûbu ve eşyâ-i muharrere dahi mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 13 Zilhicceti’ş-şerîfe sene 1196 Şühûdü’l-hâl: İmâm-ı mahalle-i mezbûre Mehmed Efendi b. Halil, Müezzin Mustafa b. Halil, el-Hâc İbrahim b. Hüseyin, Kemhacı Ömer Ağa b. Mustafa, Mustafa b. Abdullah, Mehmed Emin b. İbrahim, Ahmed b. Musa, Ömer Beşe b. Mehmed, Mahmud Odabaşı b. Hüseyin, İbrahim b. Hüseyin, Molla Ali b. Halil ve gayruhum.