Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 165 Hüküm no: 124 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Delo’nun eşi Anaştaşya’yı daha önceden boşamış olduğu İstihbâr-ı tatlîk Mahrûse-i Galata muzâfâtından Beşiktaş nâhiyesine tâbi‘ Arnabud karyesinde mütemekkine ve şahsı vech-i şer‘î üzere mu‘arrefe olan işbu bâ‘isetü’r-rakīm Anaştaşya bt. İlya nâm Nasrâniyeden meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden mahmiye-i İslâmbol’da Koca Mustafa Paşa kurbünde Canbaziye mahallesinde sâkin Molla Ali b. Halil ve İbrahim Çavuş mahallesinde sâkin Salih b. Halil nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mersûmenin zevci gāib ani’l-beled Petro v. Delo nâm zimmî bin yüz doksan beş senesi Muharremi’l-harâm’ının ikinci günü zevcesi mersûmeyi bizim huzûrumuzda tatlîk eyledi, biz bu husûsa bu vech üzere şâhidleriz ve inde’l-hasm şehâdet dahi ederiz deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 7 Zilhicce sene 1196 Şühûdü’l-hâl: Molla Ali b. Halil, Salih b. Halil, Hacı Hasan b. Osman.