Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 165 Hüküm no: 125 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koruk Mahmud mahallesinden Mehmed Ağa’nın ev arsasını Ebubekir Ağa’ya satması Arsa mübâya‘ası Mahmiye-i İslâmbol’da Koruk Mahmud mahallesinde sâkin Mehmed Ağa b. Yusuf nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Ebûbekir Ağa b. es-Seyyid Hasan nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Bezzâzistân müstahfızlarından Hüseyin Çelebi’nin vakıf arsası ve bir tarafdan Süleyman Ağa arsası ve iki tarafdan tarîk-i âm ile mahdûd bi-hesâbı terbî‘i üç yüz seksen beş zirâ‘ menzil arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr es-Seyyid Ebûbekir Ağa’ya altı yüz yirmi beş buçuk guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr altı yüz yirmi beş guruşu mezbûr es-Seyyid Ebûbekir Ağa yedinden tamamen ahz ü kabz eyledim, ba‘de’l-yevm arsa-i mahdûde-i mezkûre mezbûr es-Seyyid Ebûbekir Ağa’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 16 min-Zilhicce sene 1196 Şühûdü’l-hâl: Mustafa Efendi b. Ahmed Efendi, Mehmed Ağa b. Ahmed, Mustafa Efendi b. Mehmed Efendi, Osman Usta b. ( ), Hasan Çavuş Ağa b. ( ), Osman Çavuş Ağa dâmâd-ı Halil Çavuş, Mehmed Efendi tâbi‘-i Halîfe el-Hâc Ahmed Efendi, Molla Ali b. Halil, Osman Çavuş Ağa tâbi‘-i İkinci Halîfe Ahmed Efendi ve gayruhum.