Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 166 Hüküm no: 126 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden Mustafa Ağa’nın taş duvarının bir kısmını Ebubekir Çavuş’a satması Duvar mübâya‘ası Mahmiye-i İslâmbol’da Çerâğī Hasan mahallesinde sâkin es-Seyyid Mustafa Ağa b. el-Hâc Ahmed Ağa nâm kimesne meclis-i şer‘-i şerîf-i enverde işbu bâ‘isü’l-kitâb Ebûbekir Çavuş b. İbrahim nâm kimesne tarafından vech-i âtî üzere tasdîka vekîl olduğu İmâm Abdullah Efendi b. İbrahim mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mülküm olup mahalle-i mezbûrede vâki‘ bir tarafdan mahalle imâmlarına meşrûta müşterî-i mezbûrun tasarrufunda olan vakıf menzil ve bir tarafdan Mustafa Efendi arsası ve bir tarafdan ba‘zan Derviş Beşe veresesi menzili ve ba‘zan mahmiye-i mezbûrede Koca Mustafa Paşa Câmi‘i’nde şeyh olanlara meşrûta benim tasarrufumda olan bağçe ve bir tarafdan tarîk-i âm ile mahdûd tûlen elli ve arzan bir ve kadden sekiz zirâ‘ taş duvarımın on altı zirâ‘ını yedimde ibkā ve mâ‘adâ otuz dört zirâ‘ını tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Ebûbekir Çavuş Ağa’ya yirmi beş guruşa bey‘ ve temlik ve teslîm eylediğimde ol dahi ber-vech-i [muharrer] iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruşu müvekkil-i mezbûr Ebûbekir Çavuş Ağa yedinden tamamen ahz ü kabz eyledim, ba‘de’l-yevm zikr olunan taş duvardan otuz dört zirâ‘ında benim kat‘a alâka ve medhalim kalmayıp müvekkil-i mezbûr Ebûbekir Çavuş Ağa’nın mülk-i müşterâsı ve hakk-ı sarfı olmuşdur dedikde gıbbe. Fî 17 min-Z sene 1196 Şühûdü’l-hâl: el-Hâc Mustafa b. İbrahim Kemhacılar Yiğitbaşısı, es-Seyyid Ali Ağa b. es-Seyyid Derviş Osman Kemhacılar Kethudâsı, Bostânî Mehmed Ağa b. Musa, Bekçi Seyyid Hasan b. Ali, Alemdâr Ali Ağa b. Mehmed, Çorbacı Ahmed b. Abdullah, es-Seyyid el-Hâc Ömer b. el-Hâc Mehmed, Ataullah Efendi b. Abdullah, Molla Ahmed Müezzin, es-Seyyid Osman Efendi b. Abdurrahim Müezzin ve gayruhum.