Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 211 Hüküm no: 165 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın tasarrufunda bulunan Güllü karyesi sınırları dahilindeki koru davası Ma‘rûz, Medîne-i Üsküdar’a tâbi‘ Bulgurlu karyesinde sâkin sâhib-i arzuhâl es-Seyyid el-Hâc Hasan Ağa b. İbrahim nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde medîne-i mezkûreye muzâfe Yoros nâhiyesine tâbi‘ Güllü karyesinde sâkin derûn-ı arzuhâlde ismi mezkûr es-Seyyid Mehmed b. es-Seyyid Ahmed muvâcehesinde karye-i mezkûrenin bâ-berât-ı âlîşân sipâhîsi sagīr es-Seyyid Mehmed Bey b. el-müteveffâ es-Seyyid Mehmed Bey’in li-ebeveyn ammi ve vasiyy-i mansûbu es-Seyyid Ahmed Bey b. Hasan hâzır olduğu hâlde karye-i mezbûre hudûdu dâhilinde vâki‘ bir tarafdan Hıyarlık Deresi başı ve bir tarafdan Adayolu ve Kara Mustafa Korusu sınırı ve bir tarafdan Deli Salih Korusu ve Kuzuburnu Deresi ve taraf-ı râbi‘i dere ve Kızılkaya ve Ağaç kütüğü ve Hıyarlık Deresi ile mahdûd seksen dönüm koru bin iki yüz kırk altı senesi hilâlinde Çavdaroğlu Ali nâm kimesnenin bâ-tapu müstakıllen taht-ı tasarrufunda iken mezbûr Ali’nin bilâ-veled fevtiyle koru-yı mahdûd-ı mezkûr mahlûl olmağla karye-i mezkûrenin ol târîhde sipâhîsi bulunan sagīr-i mezbûrun babası müteveffâ-yı merkūm es-Seyyid Mehmed Bey sene-i mezkûre Saferi’l-hayrı hilâlinde koru-yı mahdûd-ı mezkûru tapu-yı misliyle bana tefvîz ve tasarrufuma izin ve yedime işbu bir kıt‘a tapu temessükü dahi i‘tâ edip ol vechile koru-yı mahdûd-ı mezkûr târîh-i mezkûrdan beri benim taht-ı tasarrufumda olup ancak mezbûr Mehmed Ağa bu esnâda koru-yı mahdûd-ı mezkûra bî-vech müdâhale ve tasarrufuma mümâna‘at eder olmağla suâl olunup ber-vech-i meşrûh vâki‘ olan müdâhale ve mümâna‘atı men‘ olunmak matlûbumdur deyü da‘vâ etdikde, ol dahi cevâbında fi’l-hakīka koru-yı mahdûd-ı mezkûru karye-i mezkûrun mukaddemâ sipâhîsi olan müteveffâ-yı mezbûr es-Seyyid Mehmed Bey merkūm Çavdaroğlu Ali’nin bilâ-veled mahlûlünden bâ-tapu müdde‘î-i mezbûr el-Hâc Hasan Ağa’ya tefvîz edip lâkin sipâhî-i mezbûr es-Seyyid Mehmed Bey fevtinden sonra karye-i mezbûre sipâhiliği sagīr-i merkūma bâ-berât-ı âlîşân tevcîh buyurulduğundan koru-yı mahdûd-ı mezkûru sâlifü’z-zikr kırk altı senesi şehr-i Rebî‘ülevveli’nde tapu-yı misliyle vasiyy-i merkūm bana dahi tefvîz ve yedime tapu temessükü i‘tâ etmiş ise de merkūm es-Seyyid el-Hâc Hasan Ağa akrabam olduğu sebebden işbu târîhe gelince koru-yı mahdûd-ı mezkûru mezbûrun tasarrufuna kanâ‘at etmemiş idim. El-hâletü hâzihî mücerred vasiyy-i hâzır-ı merkūmun i‘tâ eylediği temesükk-i mezkûr yedimde mevcûd olmağla öyle olucak koru-yı mahdûd-ı mezkûr benim tasarrufumda olmuş olur deyü îrâd eylediği takrîri şer‘an ve kānûnen müvecceh ve mültefet olmadığı mezbûr es-Seyyid Mehmed’e ba‘de’t-tefhîm sâlifü’l-beyân koru-yı mahdûd-ı mezkûra merkūm es-Seyyid Mehmed’in bî-vech müdâhalesi men‘ olunduğu huzûr-ı âlîlerine i‘lâm olundu. El-emru li-men-lehü’l-emr. Fî 27 M sene [12]57.