Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 167 Hüküm no: 128 Orijinal metin no: [19b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Simkeş İsmail Ağa’nın Kartal’da satın aldığı dükkân arsası hissesine ait yanan hüccetinin yenilenmesi İstihbâr-ı arsa Mahmiye-i İslâmbol’da Aksaray kurbünde Kâtib Muslihiddin mahallesinde sâkin işbu bâ‘isü’l-kitâb Sîmkeş İsmail Ağa b. Hasan nâm kimesne meclis-i şer‘-i şerîf-i enverde takrîr-i kelâm ve bast-ı merâm edip medîne-i Üsküdar’a muzâfe Adalar nâhiyesine tâbi‘ Kartal kasabasında vâki‘ Yeni Şerbethâne kurbünde kâin bir tarafdan ba‘zan şerbethâne ve ba‘zan köprü ve bir tarafdan Balioğlu dükkânı ve bir tarafdan leb-i deryâ ve bir tarafdan tarîk-i âm ile mahdûd bir bâb muhterik berber dükkânı arsası on iki sehm i‘tibârıyla altı sehmi bâ-hüccet-i şer‘iye benim [20a] yedimde mülküm ve altı sehmi dahi işbu sene-i mübâreke Ramazan-ı şerîfi evâilinde gāibât ani’l-meclis Afife ve Zeliha ve Hediyetullah nâm hatunlardan yüz guruş semen-i medfû‘ ve makbûza bâ-hüccet-i şer‘iye yedimde mülk ve hakkım olup lâkin yedimde olan hüccetim bundan akdemce vâki‘ olan harîk-i kebîr’de muhterik olmağla arsa-i merkūmeden zikr olunan altı sehm dahi mülk-i müşterâm olduğunu müş‘ir hüccetim olmamağla takrîrim vukūf-ı tammı olan bî-garaz Müslimînden suâl ve istihbâr ve haberleri zabt ve tahrîr ve kıbel-i şer‘den hüccet olunup yedime i‘tâ olunmak matlûbumdur dedikde fi’l-hakīka arsa-i mahdûde-i mezkûrenin altı sehmi dahi mukırr-ı mezbûr İsmail Ağa işbu sene-i mübâreke Ramazan-ı şerîfi evâilinde gāibât-ı mezbûrât Afife ve Zeliha ve Hediyetullah hatunlardan yüz guruş semen-i medfû‘ ve makbûza müşterâ bâ-hüccet-i şer‘iye yedimde mülküm olduğunu Molla Ali b. Halil ve Mustafa b. Mustafa nâm kimesnelerden herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen [li’l-makāl] bi’t-taleb. Fî 18 Zilhicce sene 1196 Şühûdü’l-hâl: Es-Seyyid Hasan b. Veliyüddin, Molla Ali b. Halil, Hacı Hasan b. Osman, Mustafa b. Mustafa, Hüseyin Efendi b. İbrahim Efendi.