Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 168 Hüküm no: 129 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Simkeş İsmail Ağa’nın Kartal’daki dükkân arsasını Derohi bt. Abkar’a satması Arsa mübâya‘ası Kezâlik meclis-i şer‘-i şerîf-i enverde işbu hâmiletü’r-rakīm Derohi bt. Abkar nâm Nasrâniyenin sadrî kebîr oğlu tarafından vech-i âtî üzere tasdîka vekîl olduğu ber-nehc-i şer‘î sâbit olan Kasbar v. Mardoros nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup medîne-i Üsküdar’a muzâfe Adalar nâhiyesine tâbi‘ Kartal kasabasında vâki‘ Yeni Şerbethâne kurbünde kâin bir tarafdan ba‘zan şerbethâne ve ba‘zan köprü ve bir tarafdan Balioğlu dükkânı ve bir tarafdan leb-i deryâ ve bir tarafdan tarîk-i âm ile mahdûd bir bâb muhterik berber dükkânı arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mersûme Derohi Nasrâniyeye iki yüz otuz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz otuz guruşu müvekkile-i mersûme yedinden tamamen ahz ü kabz eyledim, ba‘de’l-yevm arsa-i mahdûde-i mezkûre müvekkile-i mersûme Derohi Nasrâniyenin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 19 Zilhicce sene 1196 Şühûdü’l-hâl: Şâhidûn-ı sâbıkūn.