Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 169 Hüküm no: 130 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aydın Kethuda mahallesinden Ümmülhayr bt. Halil’in Emine bt. Ali’deki alacağını tahsil etmesi Ahz ü kabz Mahmiye-i İslâmbol’da Aydın Kethudâ mahallesinde sâkine ve zâtı vech-i şer‘î üzere mu‘arrefe olan Ümmülhayr bt. Halil nâm hatun meclis-i şer‘-i şerîf-i enverde yine kezâlik zâtı mu‘arrefe işbu bâ‘isetü’l-vesîka Emine bt. Ali nâm hatun mahzarında ikrâr ve takrîr-i kelâm edip mezbûre Emine Hatun bundan akdem yedimde ve mâlımdan istidâne ve kabz ve umûruna sarfla istihlâk eylediği yüz guruş alacak hakkımın altmış guruşunu mukaddemce ve bâkī kırk guruşunu hâlâ bana def‘ ü teslîm eyledikde ben dahi yedinden tamamen ahz ü kabz edip meblağ-ı merkūm yüz guruşdan mezbûre Emine Hatun yed ve zimmetinde bir akçe ve bir habbe alacak hakkım kalmamağla husûs-ı mezkûra ve sâire müte‘allika âmme-i de‘âvî ve kâffe-i mutâlebâtdan mezbûre Emine Hatun’un zimmetini ibrâ ve ıskāt eylediğimde ol dahi ber-minvâl-i muharrer ibrâmı kabûl eyledi dedikde gıbbe’t-tasdîk. Fî 20 min-Zilhicce sene 1196 Şühûdü’l-hâl: el-Hâc Hasan b. Osman, Mustafa b. Mustafa, Salih b. Halil, Molla Ali b. Halil.