Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 212 Hüküm no: 166 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köşeli Zeynep’in, Kartal ahalisinden bazıları hakkındaki davasında haksız olması Ma‘rûz, Sâdır olan fermân-ı âlîlerine imtisâlen medîne-i Gekbüze kazâsı mülhakātından Kartal kasabası sâkinlerinden sâhibe-i arzuhâl mu‘arrefetü’z-zât Köşeli Zeyneb bt. Mustafa nâm Hatun Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘de kasaba-i mezbûre ahâlîsinden derûn-ı arzuhâlde isimleri mezkûr Sarrâc el-Hâc Mustafa b. Ali ve el-Hâc Süleyman b. Mehmed ve Molla Ahmed oğlu Ahmed nâm kimesneler muvâcehelerinde ben kasaba-i mezbûre sâkinlerinden olarak kendi hâlimde ırzımla mukayyed iken merkūmûn el-Hâc Mustafa ve el-Hâc Süleyman ve Ahmed’den her biri bana garaz-ı nefsâniyelerinden mebnî kasaba-i mezbûrede kâin sâkine olduğum menzilimde iskânıma mümâna‘at etmeleriyle suâl olunup vâki‘ olan mümâna‘atları men‘ ü def‘ olunması murâdımdır deyü ba‘de’d-da‘vâ ve’l-istintâk merkūmûn dahi cevâblarında fi’l-hakīka müdde‘iyye-i mezbûre Zeyneb Hatun sâlifü’z-zikr Kartal kasabası sâkinelerinden olup lâkin kendü hâlinde ırzıyla mukayyede olmayıp dil-âzâr olduğundan başka şer ve fesâd ile me’lûfe olmağla bi’d-defa‘ât kendüye tenbîh olundukda aslâ mütenebbih olmayıp ızrârında ısrâr üzere olduğuna mebnî işbu yedimizde olup sene-i sâbıkā Zilhicceti’ş-şerîfesi’nin [46b] yirmi beşinci günü târîhiyle müverrah kasaba-i mezbûre meclisinden verilen bir kıt‘a mazbata i‘lâmı nâtık olduğu üzere kasaba-i mezbûre ahâlîsi bi-ecma‘ihim kasaba-i mezbûre meclisinde merkūme Zeyneb Hatun’un muvâcehesinde ber-vech-i meşrûh sû-i hâlinden bahisle iştikâ etmeleriyle ol vechile merkūme Zeyneb Hatun kasaba-i mezbûreden ihrâç olunmuş idi deyü mazmûnu takrîrlerine mutâbık i‘lâm-ı mezkûru ibrâz ile eyledikleri takrîrlerini ve mazmûn-ı i‘lâm-ı mezkûru mezbûre Zeyneb Hatun tasdîk etmeğin mûcebince merkūme Zeyneb Hatun da‘vâ-yı mezkûresiyle merkūmûn el-Hâc Mustafa ve el-Hâc Süleyman ve Ahmed’den her birine bî-vech mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr. Fî 25 M sene [12]57.