Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 177 Hüküm no: 142 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden Zeyneb bt. Abdullah’ın kocasından boşanması Muhâla‘a Mahmiye-i İslâmbol’da Cafer Ağa mahallesinde sâkine ve zâtı ta‘rîf-i şer‘î ile mu‘arrefe olan Zeyneb bt. Abdullah nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid İbrahim b. Mustafa nâm kimesne mahzarında ikrâr ve takrîr-i kelâm edip mezbûr es-Seyyid İbrahim zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan otuz guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olup ve zevcim mezbûra mâlımdan medfû‘um olan on guruş dahi bedel-i hul‘ olmak üzere zevcim mezbûr es-Seyyid İbrahim ile muhâla‘a-i sahîha-i şer‘iye ile hul‘ olduğumda ol dahi hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûrun zimmetini ibrâ ve ıskāt eylediğimde ol dahi hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 2 Muharrem sene 1197 Şühûdü’l-hâl: Mehmed Salim Efendi b. Hasan, Molla Ali b. Halil, Mustafa b. Mustafa.