Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 178 Hüküm no: 144 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliya mahallesinden Mehmed Ağa’nın bakkal dükkânını Filibon v. Dimo’ya satması Bakkāl dükkânı mübâya‘ası Mahmiye-i İslâmbol’da Mevlevîhâne Yenikapısı dâhilinde el-Hâc Evliyâ mahallesinde sâkin el-Hâc Mehmed Ağa b. Abdullah nâm kimesne meclis-i şer‘-i şerîf-i enverde işbu hâmilü’s-sifr Filibon? v. Dimo nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Hacı Yahya Efendi menzili ve bir tarafdan Çorbacı İbrahim Ağa menzili ve bir tarafdan Hilâlî Mehmed Ağa menzili ve bir tarafdan tarîk-i âm ile mahdûd fevkınde iki bâb harâb oda ve tahtında bir mikdâr havluyu müştemil dört kepenk bir bâb mülk bakkāl dükkânımı cümle tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Filibon zimmîye beş yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr beş yüz guruşu merkūm Filibon zimmî yedinden tamamen ahz ü kabz edip mebî‘-i mezkûru gabn ve tağrîrine müte‘allika âmme-i de‘âvîden dahi merkūm Filibon zimmînin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm dükkân-ı mahdûd-ı mezkûr cemî‘ müştemilâtıyla merkūm Filibon zimmînin mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 2 Muharremi’l-harâm sene 1197 Şühûdü’l-hâl: Molla Mustafa b. Osman, es-Seyyid Mehmed Çavuş Ağa, Hacı Yahya Efendi b. Mustafa, Çorbacı Ahmed Ağa b. ( ), Ali Efendi b. ( ), Molla Ali b. Halil, Mustafa b. Mustafa. Abdullah Efendi b. İbrahim Efendi’ye bey‘ şüd, fî 8 min-Ş sene 1197 Numara: 850 Sicil: 2