Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 179 Hüküm no: 145 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Saliha bt. Abdullah’ın başka memlekete gidip dönmeyen kocasından koşulan şart gereği boşanmış sayılması İstihbâr-ı tatlîk Mahmiye-i İslâmbol’da Uzun Yusuf mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-vesîka Saliha bt. Abdullah nâm hatundan meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden ve mahalle-i mezbûre sükkânından es-Seyyid Mustafa b. es-Seyyid Abdullah nâm kimesne ile nisâ tâifesinden Zeyneb bt. Mustafa ve Fatıma bt. İbrahim nâm hatunlar zât-ı müstahbireyi ârifûn oldukları hâlde li-ecli’l-ihbâr meclis-i şer‘a hâzırûn olup istihbâr olundukda fi’l-hakīka işbu müstahbire-i mezbûre Saliha Hatun’un zevci gāib ani’l-beled es-Seyyid Abdullah b. Abdullah nâm kimesne bin yüz seksen dokuz senesi mâh-ı Muharremi’l-harâm’ının beşinci günü diyâr-ı âhara gider oldukda mahalle-i mezbûrede vâki‘ menzilinde eğer ben târih-i mezbûrdan bir seneye dek gelmez isem zevcem mezbûre Saliha Hatun benden boş olsun deyü şart ve ta‘lîk ve bizi işhâd ve târih-i mezbûrdan beri mahmiye-i mezbûreye geldiği ma‘lûmumuz değildir, biz bu husûsa bu vech üzere şâhidleriz ve inde’l-hasm şehâdet dahi ederiz deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 2 min-Muharremi’l-harâm sene 1197 Şühûdü’l-hâl: Müezzin Halil Efendi b. Mustafa, Selim Ağa b. Mustafa, es-Seyyid Mustafa b. es-Seyyid Abdullah, Hacı Hasan b. Osman, Molla Ali b. Halil ve gayruhum.