Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 213 Hüküm no: 167 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadıköylü Bağcı Ali’nin, Zeliha bt. Hüseyin aleyhindeki alacak iddiasını ispat edememesi Ma‘rûz, Medîne-i Üsküdar’a tâbi‘ Kādı karyesinde sâkin Bağcı Ali b. Mustafa nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde mukaddemâ kayınvâlidesi mu‘arrefetü’z-zât Şerife Zeliha bt. es-Seyyid Hüseyin nâm Hatun muvâcehesinde mezbûre Şerife Zeliha Hatun zimmetinde işbu yedimde olup bin iki yüz elli altı senesi Cemâziyelâhiri’nin yirmi yedinci günü târîhiyle müverrah bir kıt‘a temessük mantûkunca cihet-i karzdan alacak hakkım olan beş yüz guruş ve malımdan fuzûlî ahz ve âhara bey‘le istihlâk eylediği bir re’s inek kıymetinden damânen alacağım olan iki yüz guruş ki cem‘an yedi yüz guruşu bana edâya mezbûre Şerife Zeliha Hatun’a tenbîh olunmak matlûbumdur deyü da‘vâ etdikde merkūme Şerife Zeliha Hatun dahi cevâbında külliyen inkâr etmekle müdde‘î-i merkūm Ali ber-vech-i muharrer müdde‘âsına ikāmet-i beyyine edemeyip bi’t-taleb mezbûre Şerife Zeliha Hatun’a bi’l-muvâcehe ber-nehc-i şer‘î yemîn verilmeğin mûcebince müdde‘î-i merkūm Ali da‘vâ-yı mezkûresiyle mezbûre Şerife Zeliha Hatun’a bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr. Fî 5 M sene [12]57.