Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 183 Hüküm no: 150 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza mahallesinden Ahmed Beşe’nin ev arsasındaki yarı hissesini hanımına satması Nısf arsa mübâya‘ası Mahmiye-i İslâmbol’da el-Hâc Hamza mahallesinde sâkin Ahmed Beşe b. İbrahim nâm kimesne tarafından husûs-ı âti’l-beyânı ikrâra vekîl olduğu es-Seyyid Mahmud Ağa b. es-Seyyid Hüseyin ve Mumcu Halil Ağa b. Hüseyin nâm kimesne[ler] şehâdetleriyle şer‘an sâbit olan Mustafa Çavuş Ağa b. Osman nâm kimesne meclis-i şer‘-i şerîf-i enverde müvekkil-i mezbûrun hâlâ zevcesi mu‘arrefetü’z-zât işbu bâ‘isetü’l-kitâb Fatıma bt. İsmail nâm hatun mahzarında bi’l-vekâle ikrâr ve takrîr-i kelâm edip müvekkilim mezbûr Ahmed Beşe akd-i âti’z-zikrin sudûruna değin bâ-hüccet-i şer‘iye şirâen yedinde mülk ve hakkı olup mahmiye-i mezbûrede Başcı el-Hâc Mahmud mahallesinde kâin bir tarafdan Musa Beşe arsası ve bir tarafdan Türkmenoğlu İsmail arsası ve bir tarafdan sâbıkā Yeniçeri ağası Mustafa Ağa arsası ve bir tarafdan tarîk-i hâs ile mahdûd bir bâb mülk menzil arsasının nısf-ı şâyi‘i müşteriye-i mezbûrenin mülkü ve nısf-ı şâyi‘-i âharı dahi müvekkilim mezbûrun mülkü olmağın müvekkilim mezbûr arsa-i mahdûde-i mezkûrenin nısf-ı şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcesi mezbûre Fatıma Hatun’a yirmi guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mütâlebesinden müvekkilim mezbûr Ahmed Beşe zevcesi mezbûre Fatıma Hatun’un zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm nısf menzil-i mezkûr dahi mezbûre Fatıma Hatun’un mülk-i müşterâsı ve hakk-ı [22b] [sırfı] olup müvekkilim mezbûr Ahmed Beşe’nin kat‘a alâka ve medhali yokdur dedikde gıbbe’t-tasdîki’ş-şer‘î mâ-vaka‘a. Fî 5 Muharrem sene 1197 Şühûdü’l-hâl: Molla Ali b. Halil, Molla Mustafa b. Mehmed, Saka Osman b. Abdullah, Küçük Osman b. Ali, Hasan Ağa b. Mehmed Yüzbaşı.