Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 183 Hüküm no: 151 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza mahallesinden Ahmed Beşe’nin birlikte oturduğu evdeki bazı eşyaları hanımına satması Eşyâ mübâya‘ası ma‘a nefy-i mülk Kezâlik takrîr-i kelâm edip müvekkilim mezbûr Ahmed zevcesi mezbûre Fatıma Hatun ile mahalle-i mezbûrede vâki‘ mâ‘an sâkin oldukları menzilde mevcûd müvekkilim mezbûrun yedinde ancak mâlı ve mülkü dört tencere ma‘a kapak ve dört sahan ve üç sahan kapağı ve üç lenger ve bir sini ve bir tâbe ve bir güğüm ve bir kadayıf tepsisi ve iki şorba tası ve bir leğen ma‘a ibrik ve iki yemeni yorgan ve bir döşek ve bir çuka biniş ve bir destâr ve bir bogasi şalvara münhasıra olup bunlardan mâ‘adâ menzil-i mezkûrda mevcûd melbûsât ve mefrûşât ve evân-ı nühâsiye ve gayr-ı nühâsiye ve bi’l-cümle eşyâ-i sâire zevcesi mezbûre Fatıma Hatun’un mâlı ve mülkü olup müvekkilim mezbûr Ahmed’in kat‘a alâka ve medhali olmamağın müvekkilim Ahmed eşyâ-i muharrere-i mezkûreyi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcesi mezbûre Fatıma Hatun’a on beş guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on beş guruş mütâlebesinden zevcesi mezbûre Fatıma Hatun’un zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre Fatıma Hatun’un mülk-i müşterâsı ve hakk-ı sarfı olup müvekkilim mezbûr Ahmed’in kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 5 Muharrem sene 1197 Şühûdü’l-hâl: Şâhidûn-ı sâbıkūn.