Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 184 Hüküm no: 152 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Fatma bt. Mehmed’in bakmakta olduğu küçük çocukları için boşandığı kocasından nafaka alması Nafaka-i sagīrân Mahmiye-i İslâmbol’da İskender Ağa mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Fatıma bt. Mehmed nâm hatun meclis-i şer‘-i şerîf-i enverde zevc-i sâbıkı Ahmed Beşe b. Osman nâm kimesne mahzarında takrîr-i kelâm ve ifâde-i merâm edip zevc-i sâbıkım mezbûr Ahmed Beşe’nin firâşından hâsılân ve benden mütevellidân ve hâlâ bi-hakkı’l-hıdâne hacr u terbiyemde olan sadrî oğlum Seyyid Osman ve sadriye kızım Şerife Habibe nâm sagīrânın mâlları olmayıp nafakaya ihtiyâcları olmağla sagīrân-ı mezbûrânın nafakaları içün babası mezbûr Ahmed Beşe üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīr-i mezbûr es-Seyyid Osman’ın nafakası içün babası mezbûr üzerine bi’t-terâzî târih-i kitâbdan küllü yevm on üç akçe ve sagīre-i mezbûre Şerife Habibe’nin nafakası içün dahi on dört akçe ki cem‘an yirmi yedi akçe farz ve takdîr edip meblağ-ı mefrûz-ı mezkûru sagīrân-ı mezbûrânın nafaka ve sâir levâzım-ı zarûriyesine harc ü sarfa ve lede’l-hâce istidâneye ve inde’z-zafer babası mezbûr Ahmed Beşe üzerine rücû‘a mezbûre Fatıma Hatun’a izin vermeğin mâ-vaka‘a. Fî 8 M sene 1197 Şühûdü’l-hâl: Molla Ali b. Halil, Molla Mehmed b. Mustafa, Hacı Hasan b. Osman, Ali Ağa b. Mehmed Kapıkethudâsı.