Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 185 Hüküm no: 153 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa mahallesinden Havva bt. Ali’nin, vefat eden kocasının alacağından kendisine düşen hisseyi istemesi İsbât-ı verâset Mahmiye-i İslâmbol’da Küçükayasofya kurbünde Hüseyin Ağa mahallesinde sâkine ve zâtı vech-i şer‘î üzere mu‘arrefe olan işbu râfi‘atü’l-vesîka Havva bt. Ali nâm hatun meclis-i şer‘-i şerîf-i enverde Mehmed Sadık b. Mehmed Said nâm kimesne mahzarında üzerine da‘vâ ve takrîr-i kelâm edip mahalle-i mezbûre sâkinlerinden ve on iki bin akçe mehr-i müeccel tesmiyesiyle zevc-i dâhilim olup vilâyet-i Rumeli’nde Demirhisâr kazâsından gelir iken esnâ-i tarîkde bundan akdem vefât eden Süleyman b. Mustafa’nın işbu Mehmed Sadık zimmetinde cihet-i karzdan beş guruş alacak hakkı olup meblağ-ı mezbûru kable’l-ahz ve’l-istifâ zevcim mezbûr Süleyman fevt olmağla zevcim müteveffâ-yı mezbûrun zâhirde benden gayrı vâris-i ma‘rûf ve ma‘rûfesi olmayıp terekesinin rub‘u bana ve selâse-i erbâ‘ı cânib-i beytü’l-mâle âid ve râci‘ olmağla meblağ-ı mezbûr beş guruşdan benim rub‘ hisseme isâbet eden elli para hisse-i irsiyemi mezbûr Mehmed Sadık’dan hâlâ taleb ederim, suâl olunup alıverilmesi matlûbumdur dedikde gıbbe’l-istintâk mezbûr Mehmed Sadık cevâbında müteveffâ-yı mezbûr Süleyman’a cihet-i karzdan hâlâ zimmetinde beş guruş deyni olduğunu ikrâr lâkin müdde‘iye-i mezbûre Havva Hatun müteveffâ-yı mezbûrun zevce-i menkûhası olduğunu inkâr edicek, müdde‘iye-i mezbûre Havva Hatun’dan ber-vech-i muharrer müdde‘âsını mübeyyin beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre ahâlisinden Çukadâr Mustafa b. Mehmed ve Bekçi es-Seyyid Ahmed b. es-Seyyid Ömer nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mahmiye-i İslâmbol’da Küçükayasofya kurbünde Hüseyin Ağa mahallesi ahâlisinden olup vilâyet-i Rumeli’de Demirhisâr kazâsından gelir iken esnâ-i tarîkde bundan akdem vefât eden Süleyman b. Mustafa nâm kimesne işbu müdde‘iye-i mezbûre Havva Hatun’un on iki bin akçe mehr-i müeccel tesmiyesiyle zevc-i dâhili olup müteveffâ-yı mezbûrun müdde‘iye-i mezbûreden gayrı zâhirde vâris-i ma‘rûf ve ma‘rûfesi olduğu ma‘lûmumuz değildir, biz bu husûsa bu vech üzere şâhidleriz, şehâdet dahi ederiz deyü herbiri mezbûr Mehmed Sadık muvâcehesinde edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a. Fî 7 Muharrem sene 1197 Şühûdü’l-hâl: Molla Ali b. Halil, Hacı Hasan b. Osman, Bekçi es-Seyyid Ahmed b. es-Seyyid Ömer, Çukadâr Mustafa b. Mehmed.