Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 186 Hüküm no: 154 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Hatun mahallesinden İbrahim b. Mustafa’nın Hacce Emine Hatun ile oğlu Ömer’deki alacağını alarak zimmetlerini ibra etmesi İbrâ Mahmiye-i İslâmbol’da Hacce Hatun mahallesinde sâkin İbrahim b. Mustafa nâm kimesne meclis-i şer‘-i hatîrde zâtı vech-i şer‘î üzere mu‘arrefe olan işbu bâ‘isetü’l-vesîka Hacce Emine Hatun bt. Ahmed mahzarında ikrâr ve takrîr-i kelâm edip mezbûre Emine Hatun ile oğlu işbu hâzır bi’l-meclis es-Seyyid el-Hâc Ömer talebleri ve beher yevm yirmişer para ücret tesmiyesiyle târih-i kitâbdan on gün mukaddeme gelince mezbûre Emine Hatun’un menzilinde üç buçuk ay mikdârı dülgerlik hizmeti etmemle müddet-i mezkûrede sebk eden hizmetimin ecr-i müsemmâsı olan cem‘an elli guruşu oğlu hâzır-ı mezbûr es-Seyyid el-Hâc Ömer bi’d-defa‘ât bana def‘ ve teslîm etmekle ben dahi yedinden tamamen ahz ü kabz edip müddet-i merkūmede sebk eden hizmetimin ecr-i müsemmâsına ve bi’l-cümle husûs-ı mezkûra ve gayra müte‘allika âmme-i de‘âvî ve kâffe-i mutâlebât ve eymân ve muhâsamâtdan mezbûre Emine Hatun ile oğlu hâzır-ı mezbûr es-Seyyid el-Hâc Ömer’in zimmetlerini ibrâ ve ıskāt eylediğimde onlar dahi ber-minvâl-i muharrer ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a. Fî 9 Muharrem sene 1197 Şühûdü’l-hâl: Kapıkethudâsı Ali b. Mehmed, Molla Ali b. Halil, el-Hâc Hasan b. Osman, Mustafa b. Mustafa, Molla Mehmed b. Mustafa.