Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 186 Hüküm no: 155 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Emine bt. İbrahim’in kocasından boşanması Muhâla‘a Mahmiye-i İslâmbol’da Koca Mustafa Paşa mahallesinde sâkine takrîben on iki yaşında olup cüssesinin bulûğa tahammülü olmağla rü’yet-i dem-i hayzla bulûğunu mu‘terife ve zâtı ta‘rîf-i şer‘î ile mu‘arrefe olan Emine bt. İbrahim nâm hatun meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-vesîka Hasan b. Abdülhamid nâm kimesne mahzarında ikrâr ve takrîr-i kelâm edip mezbûr Hasan zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yirmi beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Hasan ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve hîn-i akidde mu‘accel tesmiye olunan nakid on guruş ile bir minder ve kıtık memlû iki yemeni yasdık ve bir yemeni yorgan ve bir leğen ma‘a ibrik ve bir tencere ma‘a kapak ve iki sahana müte‘allika âmme-i de‘âvî ve kâffe-i mütâlebâtdan ben zevcim mezbûr Hasan’ın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mukırre-i mezbûre Emine Hatun’un babası mezbûr İbrahim b. Osman nâm kimesne yine meclis-i şer‘de dâmâdı mezbûr Hasan mahzarında takrîr-i kelâm edip kızım mezbûre Emine Hatun ba‘de zaman adem-i bulûğ iddi‘âsıyla zevci mezbûrdan mehreyn-i mezkûreynini da‘vâ ve şer‘an nesne ahz eder ise mikdâr-ı me’hûzuna ben kefîl ve zâmin oldum dedikde mâ-vaka‘a bi’t-taleb. Fî 9 Muharrem sene 1197 Şühûdü’l-hâl: Es-Seyyid İbrahim b. el-Hâc Memiş, Derviş Ali b. Mustafa, Mehmed b. Abdullah, Halil Beşe b. Ali, Molla Ali b. Halil.