Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 187 Hüküm no: 156 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden vefat eden Ahmed Ağa’nın vârislerinin tereke konusunda sulh olmaları Mîrâsdan ibrâ Mahmiye-i İslâmbol’da Kâtib Muslihiddin mahallesinde sâkin iken bundan akdem vefât eden Ahmed Ağa b. Abdullah’ın verâseti zevce-i metrûkesi Âişe bt. Mehmed nâm hatun ile zî-rahm cihetinden li-ebeveyn kız karındaşı oğlu Molla Ali b. Mehmed nâm kimesneye münhasıra ve terekesinin rub‘u zevcesi mezbûre Âişe Hatun’a ve selâse-i erbâ‘ı mezbûr Molla Ali’ye isâbeti lede’ş-şer‘i’l-enver zâhir oldukdan sonra zâtı ta‘rîf-i şer‘î ile mu‘arrefe olan mezbûre Âişe meclis-i şer‘-i şerîf-i enverde tereke-i müteveffâ-yı mezbûra bi’l-verâse vâzı‘ü’l-yed olan işbu bâ‘isü’l-kitâb mezbûr Molla Ali mahzarında bi’l-verâse ikrâr ve takrîr-i kelâm edip mûrisim müteveffâ-yı mezbûrun terekesine mezbûr Molla Ali vâzı‘ü’l-yed olmağla zevcim müteveffâ-yı mezbûrdan i‘tibâr-ı mezkûr üzere bana isâbet eden rub‘ hisse-i irsiyem ile zevcim mezbûrun zimmetinde mütekarrer ve ma‘kūdun-aleyh olan on guruş mehr-i müeccelimi mezbûr Molla Ali’den bu esnâda taleb ve da‘vâ eylediğimde beynimizde münâza‘a vâkı‘a olmuşdu. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni mezbûr Molla Ali ile nakid on beş guruş ile bir köhne çalkafa kürk ve bir köhne çakşır ve bir Manisa alacası entari ve iki kavuk ve bir destâr ve bir yemeni yorgan üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan on guruş ile eşyâ-i mezkûreyi mezbûr Molla Ali yedinden tamamen ahz ü kabz edip hukūk-ı mîrâsa ve mehr-i müeccel-i mezkûra ve bi’l-cümle husûs-ı merkūma müte‘allika âmme-i de‘âvî ve kâffe-i mutâlebâtdan mezbûr Molla Ali’nin zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 9 Muharrem sene 1197 Şühûdü’l-hâl: Memiş b. Memiş Alemdâr, el-Hâc İbrahim, Molla Ali b. Halil, Hacı Hasan b. Osman, Mustafa b. Mustafa.