Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 188 Hüküm no: 157 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Evliya mahallesinden Ayşe bt. Abdullah’ın kocasına mehrini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Mevlevîhâne Yenikapısı dâhilinde Hacı Evliyâ mahallesinde sâkine ve zâtı vech-i şer‘î üzere mu‘arrefe olan Âişe bt. Abdullah nâm hatun meclis-i şer‘-i şerîf-i enverde hâlâ zevci işbu bâ‘isü’l-vesîka Mustafa b. Hasan nâm kimesne mahzarında ikrâr ve takrîr-i kelâm edip zevcim mezbûr Mustafa zimmetinde ma‘kūdun-aleyh olan yirmi guruş mehr-i müeccelimi hibetü’d-deyn mimmen aleyhi’d-deyn sahîhatün fehvâsınca zevcim mezbûr Mustafa’ya hibe ve temlik eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve kabûl eyledikden sonra eşyâ-i memlûkemden iki minder ve bir beledî döşek ve iki çit yorgan bâ-çârşeb ve bir yemeni baş yasdığı ve bir çuka ferâce ve bir şali entari ve bir yaşmak makrame ve bir bez gömlek ve iki don [23b] ve iki değirmi baş yemenisi ve bir Mısır hasırı ve iki tencere ve dört sahan ve bir sini ve bir kadayıf tepsisi ve bir lenger ve bir leğen ma‘a ibrik ve bir şorba tası ve bir çıkrık ve iki pirinç şamdan ve bir sepet sandığımı dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Mustafa’ya yirmi guruşa bey‘ ve temlik ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mutâlebesinden zevcim mezbûr Mustafa’nın zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm mehr-i mezkûr yirmi guruşdan zevcim mezbûr Mustafa’nın zimmeti berî’e ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 9 Muharrem sene 1197 Şühûdü’l-hâl: Sîmkeş Hasan Beşe b. Mehmed, el-Hâc Mahmud b. Mehmed, el-Hâc Mehmed Ağa b. Abdullah, Ömer Ağa b. ( ), Molla Ali b. Halil.