Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 213 Hüküm no: 168 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuruçay ahalisinden Yılanoğlu İbrahim’in Voyvoda Ömer Bey’e babasının hapisten ıtlâkı içinverdiği paranın iade olunması Ma‘rûz, Anadolu’da Kemah kazâsına tâbi‘ Kuruçay kasabası ahâlîsinden sâhib-i arzuhâl Yılanoğlu İbrahim b. el-müteveffâ Hüseyin nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde mukaddemâ kasaba-i mezbûre voyvodası Dergâh-ı âlî kapıcıbaşılarından derûn-ı arzuhâlde mezkûrü’l-ism Ömer Bey b. Hasan b. Ahmed tarafından husûs-ı âti’l-beyânda vekîl olduğu Mustafa Ağa b. Mehmed ve Ali Ağa b. Yusuf nâm kimesneler şehâdetleriyle ber-nehc-i şer‘î sâbit olan Süleyman Ağa b. Mehmed nâm kimesne muvâcehesinde müvekkil-i mûmâ-ileyh Ömer bin iki yüz kırk yedi senesi hilâlinde zikr olunan Kuruçay kasabası voyvodası iken babam müteveffâ-yı merkūm Hüseyin’i hayatında bir cürmle ithâm ve hapsedip babam merkūm hapisden ıtlâk için fuzûlî malımdan bi-gayr-ı hakkın bin guruşumu ahzetmekle meblağ-ı mezkûr bin guruşu müvekkil-i mûmâ-ileyhe izâfetle vekîl-i mezbûrdan istirdâd ederim deyü da‘vâ etdikde vekîl-i mezbûr Süleyman Ağa dahi cevâbında müvekkil-i mezbûr Ömer Bey’in müteveffâ-yı merkūm Hüseyin zimmetinde hayatında müvekkilim mûmâ-ileyhin malından ve yedinden iktirâz ve kabz ve istihlâk eylediği iki bin guruşdan bâkī bin guruş alacak hakkım olmağla müdde‘î-i mezbûr İbrahim meblağ-ı mezkûr bin guruşu babası müteveffâ-yı merkūm Hüseyin’in deyn-i mezkûruna takās olmak üzere müteveffâ-yı merkūmun hayatında emrinsiz teberru‘an müvekkil-i mûmâ-ileyhe edâ ve teslîm, ol dahi ahz ü istîfâ etmiş idi deyü mezbûr İbrahim’in inkârına mukārin bi’l-vekâle eylediği def‘ine ikāmet-i beyyine edemeyip bi’t-taleb mezbûr İbrahim bi’l-muvâcehe ber-nehc-i şer‘î tahlîf olunmağın mûcebince dâfi‘-i vekîl-i mezbûr Süleyman def‘-i mezkûruyla müdde‘î-i mezbûra bilâ-beyyine mu‘ârazadan ba‘de’l-men‘ sâlifü’z-zikr bi’l-vekâle ikrârıyla lâzım gelen meblağ-ı mezkûr bin guruş müdde‘î-i merkūm İbrahim’e redd ü teslîme müvekkil-i mûmâ-ileyh Ömer Bey’e izâfetle vekîl-i merkūm Süleyman Ağa’ya tenbîh olunduğu huzûr-ı âlîlerine i‘lâm olundu. El-emru li-men-lehü’l-emr. Fî 21 M sene [12]57.