Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 189 Hüküm no: 158 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirahor mahallesinden Nesibe bt. Mehmed’in daha önceden kocası tarafından boşanmış olduğunun tescili İstihbâr-ı tatlîk Mahmiye-i İslâmbol’da Mirâhor mahallesinde sâkine ve zâtı vech-i şer‘î üzere mu‘arrefe olan işbu râfi‘atü’l-vesîka Nesibe bt. Mehmed nâm hatundan meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden ve mahmiye-i mezbûrede Çerâğī Hasan mahallesinde sâkinler Kirişçi Ebûbekir Beşe b. Mustafa ve karındaşı Süleyman b. el-mezbûr Mustafa nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘-i şerîfe hâzırân olup istihbâr olunduklarında fi’l-hakīka işbu müstahbire-i mezbûre Nesibe Hatun’un zevci olan gāib ani’l-beled Kirişçi Mustafa b. Mustafa nâm kimesne bin yüz doksan altı senesi Şevvâli’l-mükerrem’inin on yedinci günü mahmiye-i mezbûrede Yedikule hâricinde kâin Kahveci Ömer nâm kimesnenin dükkânında zevcesi işbu müstahbire-i mezbûre Nesibe Hatun’u bizim huzûrumuzda benden boş olsun deyü tatlîk ve bizi işhâd eyledi, biz bu husûsa bu vech üzere şâhidleriz ve inde’l-hasm şehâdet dahi ederiz deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 11 M sene 1197 Şühûdü’l-hâl: Ebûbekir Beşe b. Mustafa, Süleyman Beşe b. Mustafa, Molla Ali b. Halil, el-Hâc Hasan b. Osman.