Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 189 Hüküm no: 159 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Fatma bt. Abdullah’ın kocasına mehrini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Silivrikapısı dâhilinde İbrahim Paşa mahallesinde sâkine Fatıma bt. Abdullah nâm hatun tarafından hibe ve bey‘-i âti’z-zikri ikrâra vekîl olduğu zâtını ârifân Müezzin Abdullah Efendi b. Mehmed ve Bekçi İbrahim b. Mehmed nâm kimesneler şehâdetleriyle sâbit olan İsmail Çelebi b. Osman nâm kimesne meclis-i şer‘-i şerîf-i enverde müvekkile-i mezbûrenin hâlâ zevci işbu râfi‘ü’l-vesîka Mehmed Ağa b. İsmail nâm kimesne mahzarında bi’l-vekâle ikrâr-ı tam ve takrîr-i kelâm edip müvekkilem mezbûre Fatıma Hatun zevci mezbûr Mehmed Ağa zimmetinde ma‘kūdun-aleyh olan yirmi guruş mehr-i müeccelini zevci mezbûr Mehmed Ağa’ya hibe ve temlik eylediğinde ol dahi meclis-i hibede bilâ-mâni‘ ittihâb ve temellük ve kabûl eyledikden sonra eşyâ-i memlûkesinden yün memlû müsta‘mel altı beledî yasdık ve dört minder ve bir orta keçesi ve üç yemeni yorgan bâ-çârşeb ve iki yemeni baş yasdığı ve bir sepet sandık ve bir iplik alacası entari ve bir gömlek ve bir hamam rahtı ve üç tencere bâ-kapak ve bir tâbe ve bir ocak güğümü ve dört sahan bâ-kapak ve bir leğen ve bir ibriğini dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr Mehmed Ağa’ya otuz guruşa bey‘ ve temlik ve teslîm ve semeni mutâlebesinden zimmetini ibrâ-i âm ile ibrâ ve ıskāt eylediğinde ol dahi ber-vech-i muharrer iştirâ ve temellük ve tesellüm ve ibrâsını kabûl eyledi, ba‘de’l-yevm mehr-i mezkûr yirmi guruşdan mezbûr Mehmed Ağa’nın zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup zevcesi müvekkilem mezbûre Fatıma Hatun’un aslâ alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 min-M sene 1197 Şühûdü’l-hâl: İmâm Mehmed Efendi b. Mehmed, Mehmed Emin b. Hüseyin, İsmail b. Osman, İbrahim b. Mehmed, Ahmed Beşe b. Süleyman, Molla Ali b. Halil, Nevbetçi Mustafa b. Mustafa.