Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 190 Hüküm no: 160 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Ümmügülsüm bt. Ahmed’in kocasından boşanması Muhâla‘a Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid İbrahim b. Ali nâm kimesne mahzarında ikrâr ve takrîr-i kelâm edip mezbûr es-Seyyid İbrahim zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan on altı guruş mehr-i müeccelimin dokuz guruşunu zevcim mezbûr yedinden ahz ü kabz ve bâkī yedi guruş ile nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid İbrahim ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mütâlebâtdan herbirimiz âharın zimmetini ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 13 Muharrem sene 1197 Şühûdü’l-hâl: Mehmed Emin b. el-Hâc Ali Müezzin, el-Hâc Mehmed b. Abdullah Mübâşir, Molla Ali b. Halil, Molla Mehmed b. Mustafa ve gayruhum.