Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 191 Hüküm no: 161 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinden Ebubekir Ağa b. Mehmed’in bazı eşyalarını hanımına satması Eşyâ mübâya‘ası Mahmiye-i İslâmbol’da Deniz Abdal mahallesinde sâkin Ebûbekir Ağa b. Mehmed nâm kimesne tarafından ber-vech-i âtî ikrâra vekîli olduğu es-Seyyid Mahmud b. Mehmed ve Mehmed b. Süleyman nâm kimesneler şehâdetleriyle şer‘an sâbit olan Hasan Çavuş Ağa b. Mehmed nâm kimesne meclis-i şer‘-i şerîf-i enverde müvekkil-i mezbûrun hâlâ zevcesi mu‘arrefetü’z-zât işbu bâ‘isetü’l-kitâb Âişe bt. Abdullah nâm hatun mahzarında bi’l-vekâle ikrâr ve takrîr-i kelâm edip müvekkilim mezbûr Ebûbekir Ağa eşyâ-i memlûkesinden yün memlû on dört kadife yasdık ve altı minder ve dört bilek ve altı yemeni yorgan bâ-çârşeb ve bir orta keçesi ve iki yemeni baş yasdığı ve iki yüz yasdığı ve bir beledî döşek ma‘a şilte ve üç döşek çârşebi ve bir kaliçe seccâde ve bir peşkir ma‘a sofra ve bir iskemle ve beş tencere ma‘a kapak ve on sahan ma‘a kapak ve beş sagīr sahan ve bir şorba tası ve bir sini ve bir tepsi ve bir kazgan ve bir güğüm ve bir leğen ma‘a ibrik ve bir âbdest leğeni ve bir tâbesini tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Âişe Hatun’a yüz guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruş mütâlebesinden mezbûre Âişe Hatun’un zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre mezbûre Âişe Hatun’un mülk-i müşterâsı ve hakk-ı sarfı olup müvekkilim mezbûr Ebûbekir Ağa’nın kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 13 Muharrem sene 1197 Şühûdü’l-hâl: Es-Seyyid Hüseyin Efendi b. Hasan, Ali Çavuş Ağa b. Musa, Aşçı el-Hâc Mehmed b. ( ), el-Hâc Hüseyin b. Mehmed, Ahmed Beşe b. Ali, Molla Ali b. Halil, Mustafa b. Mustafa.