Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 191 Hüküm no: 162 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinden Ebubekir Ağa’nın evinin yarı hissesini hanımına satması Kezâlik bi’l-vekâle ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye müvekkilim mezbûr Ebûbekir Ağa’nın yedinde mülk ve hakkı olup mahalle-i mezbûrede vâki‘ bir tarafdan Çorbacı Osman Ağa menzili ve bir tarafdan es-Seyyid Ahmed Ağa menzili ve bir tarafdan Abdullah menzili ve bir tarafdan tarîk-i âm ile mahdûd hâriciyede tahtânî iki bâb oda ve kenîf ve bir ahur ve bir mikdâr havlu ve dâhiliyede fevkānî iki bâb oda ve bir sofa ve kenîf ve bir âbdesthâne ve tahtânî bir oda ve iki bi’r-i mâ ve bağçe ve bir mikdâr havluyu müştemil bir bâb mülk menzilin nısf-ı şâyi‘ini müvekkilim mezbûr Ebûbekir Ağa yedinde ibkā ve nısf-ı şâyi‘-i âharını tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcesi mezbûre Âişe Hatun’a iki yüz elli guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz elli guruş mütâlebesinden müvekkilim mezbûr Ebûbekir Ağa mezbûre Âişe Hatun’un zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm nısf menzil-i mahdûd-ı mezkûrda müvekkilim mezbûr Ebûbekir Ağa’nın kat‘a alâka ve medhali kalmayıp zevcesi mezbûre Âişe Hatun’un mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 min-M sene 1197 Şühûdü’l-hâl: Sâbıkūn.