Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 192 Hüküm no: 163 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Ahmed Efendi’nin Kandiye’de vefat eden kız kardeşi Rukiye’nin vârisi olduğunu ispatlaması Mahmiye-i İslâmbol’da Ali Fakih mahallesi ahâlisinden olup Cezâir-i Bahr-ı Sefîd’den cezîre-i Kandiye’de müsâfireten sâkine iken bundan akdem fevt olan Rukiye bt. İbrahim nâm hatunun li-ebeveyn er karındaşı ve hasran vârisi olup mahalle-i mezbûrede sâkin işbu bâ‘isü’l-kitâb Ahmed Efendi b. el-mezbûr İbrahim meclis-i şer‘-i şerîf-i enverde takrîr-i kelâm ve ifâde-i merâm edip mahalle-i mezbûrede vâki‘ bir tarafdan el-Hâc Sadullah menzili ve bir tarafdan mahalle-i mezbûre imâmına meşrûta vakıf menzil ve iki tarafdan tarîk-i âm ile mahdûd fevkānî iki bâb oda ve bir matbah odası ve bir sofa ve dîvânhâne ve kenîf ve âbdesthâne ve tahtânî iki bâb oda ve kenîf ve kömürlük ve bi’r-i mâ ve bağçe ve bir mikdâr havluyu müştemil bir bâb mülk menzilin nısf-ı şâyi‘i ( ) nâm hatunun mülkü ve nısf-ı şâyi‘-i âharı dahi kız karındaşım mûrisem müteveffât-ı mezbûre Rukiye Hatun’un hayatında ile’l-vefât yedinde mülk ve hakkı olup ba‘de vefâtihâ nısf menzil-i mahdûd-ı mezkûr bana mevrûs olmağla nısf menzil-i mezkûr ber-vech-i muharrer benim mülk-i mevrûsum olduğunu müş‘ir yedimde hüccetim olmamağla takrîrim vukūf-ı tammı olan bî-garaz kimesnelerden suâl ve istihbâr ve haberleri zabt u tahrîr ve hüccet olunup yedime i‘tâ olunmak matlûbumdur dedikde mahalle-i mezbûre ahâlisinden es-Seyyid Feyzullah Efendi b. Mehmed ve es-Seyyid Ali Efendi b. Halil ve İsmail Efendi b. İsmail nâm kimesneler li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka menzil-i mezkûrun nısf-ı şâyi‘i müstahbir-i mezbûrun kız karındaşı müteveffât-ı mezbûre Rukiye Hatun’dan mevrûs yedinde mülk-i sahîh ve hakk-ı sarîhi olup mezbûr Ahmed Efendi’den gayrı vâris ve vârisesi olduğu ma‘lûmumuz değildir deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 13 Muharrem sene 1197 Şühûdü’l-hâl: İsmail Efendi b. İsmail, Süleyman b. Ali Müezzin, Osman b. Ali, es-Seyyid Mehmed Said b. ( ), el-Hâc İbrahim b. İbrahim, es-Seyyid Ali Efendi b. Halil, Molla Ali b. Halil.