Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 193 Hüküm no: 164 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Ahmed Efendi’nin ev hissesini Ahmed Efendi’ye satması Mübâya‘a-i menzil Mahmiye-i İslâmbol’da Ali Fakih mahallesinde sâkin Ahmed Efendi b. İbrahim nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb diğer Ahmed Efendi b. Mustafa nâm kimesne tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan es-Seyyid Feyzullah Efendi b. es-Seyyid Mehmed nâm kimesne mahzarında ikrâr-ı tam ve takrîr-i kelâm edip mahalle-i mezbûrede vâki‘ bir tarafdan mahalle-i mezbûre imâmına meşrûta vakıf menzil ve bir tarafdan el-Hâc Sadullah Efendi menzili ve iki tarafdan tarîk-i âm ile mahdûd fevkānî iki bâb oda ve bir matbah odası ve bir sofa ve dîvânhâne ve kenîf ve âbdesthâne ve tahtânî iki bâb oda ve kenîf ve bi’r-i mâ ve kömürlük ve ahur ve bağçe ve bir mikdâr havluyu müştemil bir bâb mülk menzilin nısf-ı şâyi‘i ( ) nâm hatunun yedinde mülkü ve nısf-ı şâyi‘-i âharı dahi bâ-hüccet-i şer‘iye irsen benim yedimde mülk ve hakkım olmağın ben menzil-i mahdûd-ı mezkûrda ber-vech-i muharrer mâlik olduğum nısf hisse-i irsiye-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr diğer Ahmed Efendi’ye üç yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz guruşu müvekkil-i mezbûr diğer Ahmed Efendi yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrun nısf-ı şâyi‘i mezbûr diğer Ahmed Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharremi’l-harâm sene seb‘a ve tis‘în ve mi’e ve elf. Şühûdü’l-hâl: Şâhidûn-ı sâbıkūn.