Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 193 Hüküm no: 165 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hanife Hatun’un Sancakdar Hayreddin mahallesindeki değirmenini Selim Ağa’nın nukud vakfına satması Vakfa mübâya‘a Mahmiye-i İslâmbol’da ( ) mahallesinde sâkine ve zâtı İmâm Mehmed Salih Efendi b. Mehmed Said ve Mehmed Emin Efendi b. el-Hâc Ali nâm kimesneler ta‘rîfleriyle mu‘arrefe olan Şerife Hanife Hatun bt. es-Seyyid Hüseyin meclis-i şer‘-i hatîr-i lâzımü’t-tevkīrde sâbıkā Matbah-ı âmire emîni olan umdetü’l-emâcid ve’l-ekârim müstecmi‘u’l-mehâmid ve’l-mekârim sa‘âdetlü Selim Ağa b. Abdullah b. Abdurrahman’ın medîne-i Üsküdar’da Tenbel el-Hâc Mehmed mahallesinde kâin müceddeden binâ ve ihyâ buyurdukları kütübhâne ve mekteb-i latîfleri ve mahmiye-i mezbûrede Yeniodalar derûnunda kâin kezâlik binâ ve ihyâ buyurdukları mâ-i cârî çeşme ve cihât-ı sâiresi içün mevkūfe ve akāra tebdîli meşrûta nukūdun vâkıfı ve bi’l-meşrûta mütevellîsi işbu sâhibü’l-kitâbi’l-müstetâb müşârün-ileyh Selim Ağa taraf-ı şerîflerinden vech-i âtî üzere vekîl-i müsecceli olduğu el-Hâc Mehmed b. Veyis ve Kilârî Ömer Ağa b. Ebîbekir nâm kimesneler şehâdetleriyle sâbit olan Hatibzâde Hafız İbrahim Efendi b. Hafız Mustafa mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mülk ve hakkım olup mahmiye-i mezbûrede Sancakdâr Hayreddin mahallesinde vâki‘ bir tarafdan mezbûr es-Seyyid Hüseyin Ağa’nın âhar arsası ve bir tarafdan değirmen ve bir tarafdan Kasabbaşı bağçesi ve bir tarafdan tarîk-i âm ile mahdûd terbî‘an dört yüz zirâ‘ mülk arsa üzerinde mebnî fevkānî iki bâb oda ve sofa ve samanhâne ve dört anbar ve bi’r-i mâ ve ahur ve bir mikdâr havluyu müştemil üç horoslu bir bâb mülk değirmenimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile vakf-ı merkūm içün mütevellî müvekkil-i müşârün-ileyh Selim Ağa’ya iki bin üç yüz elli guruşa bey‘ ve teslîm eylediğimde ol dahi nukūd-ı mevkūfe-i mezbûre ile vakf-ı merkūm içün bi’t-tevliye iştirâ ve tesellüm ve kabûl eyledikden sonra semeni olan meblağ-ı merkūm iki bin üç yüz elli guruşun üç yüz elli guruşunu mâl-ı vakf-ı mezbûrdan olmak üzere mütevellî müvekkil-i müşârün-ileyh yedinden ahz ü kabz mâ‘adâ iki bin guruşunu ibkā edip değirmen-i mezbûrun vakf-ı merkūm müsakkafâtından oldukdan sonra mütevellî-i müvekkil-i müşârün-ileyh Selim Ağa tarafından bi’t-tevliye yedime i‘tâ eylediği bir kıt‘a temessük mantûkunca değirmen-i mahdûd-ı mezbûru iki bin guruş icâre-i mu‘accele ve yevmî iki akçe icâre-i müeccele ile îcâr ve teslîm ve semen-i mezkûrdan ibkā eylediğim iki bin guruşu mu‘accele-i merkūme iki bin guruşa mahsûb ve takas eylediğinde ben dahi ber-vech-i muharrer istîcâr ve tesellüm ve mukāssa ve kabûl edip mebî‘-i mezkûrun gabn-ı tağrîrine ve mu‘accele-i merkūmenin adem-i istifâsına müte‘allika âmme-i de‘âvîden dahi cânib-i vakf-ı merkūm ile zimmet-i mütevellî-i müvekkil-i müşârün-ileyhi ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîk. Fî 12 min-Muharrem sene 1197 Şühûdü’l-hâl: Molla Ali b. Halil, Hüseyin Efendi b. İbrahim, Hafız Mehmed Salim Efendi b. Hüseyin, Hafız Mustafa b. Hafız İbrahim, Mi‘mâr diğer Hafız İbrahim b. Ömer, Ömer Ağa b. Mustafa, Mehmed Emin b. Ahmed, el-Hâc Mehmed Ağa b. Veyis.