Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 195 Hüküm no: 166 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pîrî mahallesinden Zeyneb bt. Abdullah’ın bazı eşyalarını Kalaycı Yusuf Çelebi’ye satması Eşyâ mübâya‘ası Mahmiye-i İslâmbol’da hısnı ebvâbından Yedikule dâhilinde el-Hâc Pîrî mahallesinde sâkine Zeyneb bt. Abdullah nâm hatun tarafından hibe ve bey‘-i âti’z-zikri ikrâra vekîl olduğu zât-ı mezbûreyi ârifân Mehmed b. Mustafa ve İsmail b. Ali nâm kimesneler şehâdetleriyle şer‘an sâbit olan Cevrî Mustafa b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-vesîka Kalaycı Yusuf Çelebi b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Zeyneb Hatun yedinde mâlı ve mülkü olan bir çift sîm kuşağını hibe-i sahîha-i şer‘iye ile mezbûr Yusuf Çelebi’ye hibe ve temlik ve teslîm eylediğinde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i sâiresinden kıtık memlû iki beledî yasdık ve bir beledî döşek ve bir yemeni müsta‘mel yorgan ve iki sagīr yemeni baş yasdığı ve bir köhne orta keçesi ve iki müsta‘mel Şam alacası entari ve üç bez gömlek ve iki gömleklik melez bezi ve bir köhne çuka ferâce ve bir sini ve bir leğenini dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Yusuf Çelebi’ye yirmi guruşa bey‘ ve temlik ve teslîm eylediğinde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mütâlebesinden müvekkilem mezbûre Zeyneb Hatun mezbûr Yusuf Çelebi’nin zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm zikr olunan bir çift sîm kuşak mezbûr Yusuf Çelebi’nin mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Zeyneb Hatun’un kat‘a alâka ve medhali kalmamışdır dedikde gıbbe. Fî 16 min-Muharrem sene 1197 Şühûdü’l-hâl: İshak Efendi b. Mustafa İmâm-ı mahalle-i mezbûr, Müezzin Osman Efendi b. ( ), Cevrîzâde Mehmed b. ( ), İsmail b. Receb, Seyyid Mehmed Emin b. Seyyid Süleyman, İsmail b. Ali, Molla Ali b. Halil.