Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 195 Hüküm no: 167 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Bayezid-i Cedid mahallesinden Zoti v. Toşo’nun, Ali Efendi’nin tasarrufundaki vakıf bostanı kiralaması Bağçeyi îcâr ve istîcâr Mahmiye-i İslâmbol’da Sultan Bâyezid-i Cedîd mahallesinde mütemekkin Bağçevân Zoti v. Toşo nâm zimmî meclis-i şer‘-i şerîf-i enverde işbu bâ‘isü’l-vesîka kuzâtdan Ali Efendi b. el-Hâc Resul tarafından vech-i âtî üzere tasdîka vekîl olduğu ber-nehc-i şer‘î sâbit olan kuzâtdan el-Hâc İsmail Efendi b. Abdullah mahzarında ikrâr-ı tam ve takrîr-i kelâm edip müvekkil-i mezbûr Ali Efendi mahalle-i mezbûrede vâki‘ ma‘lûmü’l-hudûd derûnunda bir bağçevân odası ve bir su kuyusunu müştemil taht-ı tasarrufunda olan bir bâb vakıf bostanını târih-i kitâbdan beher sene yetmiş guruş ücret tesmiyesiyle bana îcâr ve teslîm eylediğinde ben dahi ber-vech-i muharrer istîcâr ve tesellüm ve kabûl ve ücret-i müsemmâ-yı mezkûreyi müvekkil-i mezbûr Ali Efendi’ye edâ etmek üzere ta‘ahhüd eyledim dediğini vekîl-i mezbûr el-Hâc İsmail Efendi tasdîk etmeğin mâ-vaka‘a bi’t-taleb. Fî 14 Muharrem sene 1197 Şühûdü’l-hâl: Molla Ali b. Halil, el-Hâc Hasan b. Osman, Molla Mehmed b. Mustafa, Mustafa b. Mustafa, Ali Ağa b. Mustafa.