Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 214 Hüküm no: 169 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah Ağa’nın Seferihisar Voyvodası Ali Ağa aleyhindeki ücret talebinin reddedilmesi Ma‘rûz, Sâhib-i arzuhâl Emrullah Ağa b. Ali nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı arzuhâlde mezkûrü’l-ism mukaddemâ Anadolu’da Seferihisar Günyüzü kazâsı voyvoda vekîli Ali Ağa b. Ömer nâm kimesne muvâcehesinde ben ücret ile hizmet eder makūlesinden olmamla merkūm Ali Ağa kazâ-i mezbûrda voyvoda vekîli iken bin iki yüz elli iki senesi Martı ibtidâsından sene-i mezkûre Şubatı gāyetine gelince merkūm Ali Ağa’ya talebiyle ücret kavlinsiz bir sene mu‘tâd üzere hizmet etmemle ecr-i mislim olup beher şehr sekizer yüz guruşdan mezbûrun zimmetinde müctemi‘ alacak hakkım olan dokuz bin altı yüz guruşu mezbûr Ali Ağa’dan hâlâ taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsını isbâtdan izhâr-ı acz edip istihlâf etdikde merkūm Ali Ağa bi’l-muvâcehe vech-i şer‘î üzere tahlîf olunmağın mûcebince müdde‘î-i mezbûr Emrullah Ağa da‘vâ-yı mezkûresiyle merkūm Ali Ağa’ya bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu]. Fî 9 S sene [1]257.