Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 196 Hüküm no: 168 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Hatun mahallesinden Fatma bt. Mustafa’nın daha önceden kocası Kemhacı Ali tarafından boşandığının tescili İstihbâr-ı tatlîk Mahmiye-i İslâmbol’da Hacce Hatun mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Fatıma bt. Mustafa nâm hatundan meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden ve mahmiye-i mezbûrede Silivrikapısı dâhilinde İbrahim Paşa mahallesinde sâkinler es-Seyyid Ahmed b. Mehmed ve es-Seyyid Mehmed b. Ahmed nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûre Fatıma Hatun’un zevci olan gāib ani’l-meclis Kemhacı Ali nâm kimesne bin yüz doksan altı senesi Şa‘bâni’l-mu‘azzamının on beşinci günü sâlifü’z-zikr İbrahim Paşa mahallesinde vâki‘ Börücü İsmail Beşe’nin kahvesinde zevcesi işbu müstahbire-i mezbûreyi bizim huzûrumuzda benden boş olsun deyü tatlîk ve bizi işhâd eyledi, biz bu husûsa bu vech üzere şâhidleriz ve inde’l-hasm şehâdet dahi ederiz deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 16 Muharrem sene 1197 Şühûdü’l-hâl: Es-Seyyid Ahmed b. Mehmed, es-Seyyid Mehmed b. Ahmed, Molla Ali b. Halil, Mustafa b. Mustafa.