Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 196 Hüküm no: 169 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. İbrahim’in vârislerinden olan yeğeni İbrahim’in diğer vârisler aleyhine açtığı davadan vazgeçmesi Terekeden sulh ve ibrâ Mahmiye-i İslâmbol’da Silivrikapısı dâhilinde İbrahim Paşa mahallesinde sâkin iken bundan akdem vefât eden İsmihan bt. İbrahim nâm hatunun li-ebeveyn er karındaşı oğlu ve hasran vârisi es-Seyyid İbrahim b. el-Hâc Ahmed Ağa nâm kimesne meclis-i şer‘-i şerîf-i enverde tereke-i müteveffât-ı mezbûreye bi’l-emâne vâzı‘atü’l-yed olan mu‘arrefetü’z-zât işbu bâ‘isetü’l-kitâb Âişe bt. Süleyman nâm hatun mahzarında bi’l-verâse ikrâr ve takrîr-i kelâm edip mûrisem müteveffât-ı mezbûrenin hîn-i vefâtında yanında mevcûd terekesine mezbûre Âişe Hatun bi’l-emâne vâzı‘atü’l-yed bulunmağla mezbûre Âişe Hatun tereke-i müteveffât-ı mezbûreden bana def‘ ü teslîm ve ben dahi yedinden ahz ü kabz ma‘lûmü’l-mikdâr meblağdan mâ‘adâ tereke-i müteveffât-ı mezbûreden mezbûre Âişe Hatun on beş aded zer-i mahbûb ile elli guruşu ketm u ihfâ etmekle zikr olunan altın ve nakid elli guruşu mezbûre Âişe Hatun’dan bu esnâda taleb ve da‘vâya tesaddî eylediğimde beynimizde münâza‘ât vâkı‘a olmuşdu. El-hâletü hâzihî beynimize muslihûn tavassutuyla ben tesaddî eylediğim da‘vâ-yı mezkûremden meccânen fâriğ olup zikr olunan altınlara ve nakd-i merkūma ve bi’l-cümle hukūk-ı mîrâsa müte‘allika âmme-i de‘âvî ve kâffe-i mütâlebâtdan ve eymân ve muhâsamâtdan mezbûre Âişe Hatun ile işbu hâzırûn bi’l-meclis Hafız Mustafa Efendi b. el-Hâc Ebîbekir ve kayınatası Süleyman b. Hamza nâm kimesneler ile Ümmügülsüm bt. Ahmed ve Hûri bt. Kasım nâm hatunlardan herbirinin zimmetlerini ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î. Fî 15 min-Muharrem sene 1197 Şühûdü’l-hâl: Molla Ali b. Halil, Yusuf b. İsmail, Hacı Mehmed Efendi b. ( ), İmâm-ı İbrahim Paşa Ömer Efendi b. ( ), Molla Abdi b. ( ), Hacı Hasan b. Osman, Ali Ağa b. Mehmed, Molla Mustafa b. Mustafa ve gayruhum.