Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 197 Hüküm no: 170 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Nimetullah bt. Ahmed’in kocasından boşanması Muhâla‘a Mahmiye-i İslâmbol’da Yenibahçe kurbünde Kâtib Muslihiddin mahallesinde sâkine ve zâtı vech-i şer‘î üzere mu‘arrefe olan Nimetullah bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb el-Hâc İbrahim b. Ahmed nâm kimesne mahzarında ikrâr ve takrîr-i kelâm edip mezbûr el-Hâc İbrahim zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan elli guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâc İbrahim ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mütâlebâtdan ben zevcim mezbûr el-Hâc İbrahim’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 21 min-Muharrem sene 1197 Şühûdü’l-hâl: Kahveci İbrahim Beşe b. Ahmed, el-Hâc İsmail b. Ali, Molla Ali b. Halil, el-Hâc Hasan b. Osman ve gayruhum.