Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 198 Hüküm no: 171 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Emine bt. Mustafa’nın alacağını tahsil etmesi Ahz ü kabz Mahmiye-i İslâmbol’da Arabacı Bâyezid mahallesinde sâkine Emine bt. Mustafa nâm hatunun dâmâdı ve tarafından vech-i âtî üzere ikrâra vekîl olduğu zât-ı mezbûreyi ârifân es-Seyyid Ahmed Çelebi b. Mehmed ve es-Seyyid İbrahim b. Abdullah nâm kimesneler şehâdetleriyle şer‘an sâbit olan İsmail Ağa b. Hüseyin nâm kimesne meclis-i şer‘-i hatîr-i lâzımü’t-tevkīrde işbu bâ‘iseyü’l-kitâb Mustafa Ağa b. Ali nâm kimesne kendi nefsinden asîl ve dâmâdı diğer Mustafa b. Yusuf nâm kimesne tarafından tasdîka vekîl olduğu nehc-i şer‘î ve tarîk-i mer‘î üzere sâbit olmağla mezbûr Mustafa Ağa mahzarında bi’l-vekâle ikrâr ve takrîr-i kelâm edip mezbûr Mustafa Ağa ve müvekkil-i mezbûr diğer Mustafa bundan akdem kayınvâlidem müvekkilem mezbûre Emine Hatun yedinden istidâne ve kabz eyledikleri cihet-i karzdan bin guruş deynlerini mezbûr Mustafa Ağa ve müvekkil-i mezbûr diğer Mustafa kayınvâlidem müvekkilem mezbûre Emine Hatun’a tamamen edâ ve teslîm eylediklerinde ol dahi ber-vech-i muharrer yedlerinden tamamen ahz ü kabz ve istifâ-yı hak edip meblağ-ı merkūm bin guruşdan kayınvâlidem müvekkilem mezbûre Emine Hatun’un mezbûr Mustafa Ağa ve müvekkil-i mezbûr diğer Mustafa yed ve kıbellerinde bir akçe ve bir habbe alacak hakkı bâkī kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 25 Muharremi’l-harâm sene 1197 Şühûdü’l-hâl: Ahmed Efendi b. el-Hâc Ali, diğer Ahmed Efendi b. Süleyman, es-Seyyid Mehmed Emin b. Mehmed, Mehmed Necib Efendi b. Ahmed, Mustafa Efendi b. Ahmed, es-Seyyid Ahmed Çelebi b. Mehmed, es-Seyyid İbrahim Çelebi b. Abdullah ve gayruhum.