Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 202 Hüküm no: 177 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesinden Hanım bt. Ohannes’in kocasının öldüğünün tescili İstihbâr-ı helâk-i kefere Mahmiye-i İslâmbol’da Sancakdâr Hayreddin mahallesinde mütemekkine ve şahsı vech-i şer‘î üzere mu‘arrefe olan işbu bâ‘isetü’r-rakīm Hanım bt. Ohannes nâm Nasrâniye meclis-i şer‘de ber-vech-i âtî istihbâr-ı şer‘î sudûrundan sonra ricâl-i Nasârâdan mahmiye-i mezbûrede Koca Mustafa Paşa mahallesinde mütemekkinler Bedros v. Zakar ve Manas v. Agop nâm zimmîler zât-ı müstahbire-i mersûmeyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mersûmenin zevci Aci Asvador v. Abraham nâm zimmî bin yüz seksen beş senesi Muharremi’l-harâm’ının evâhirinde mârrü’z-zikr Sancakdâr Hayreddin mahallesinde vâki‘ menzilinde hâlik olup ve lâşesini zîr-i hâke ilkāda bizler hâzır olduk, biz bu husûsa bu vech üzere şâhidleriz, şehâdet dahi ederiz deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm li-sene seb‘a ve tis‘în ve mi’e ve elf. Şühûdü’l-hâl: Molla Ali b. Halil, Salih b. Halil, Hacı Hasan b. Osman, Bedros v. Zakar, Manas v. Agop ve gayruhum.