Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 209 Hüküm no: 187 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden vefat eden Rukiye bt. Ali’nin terekesi olan evin oğulları Osman Ağa ile Ali Ağa’ya intikali İstihbâr-ı menzil Mahmiye-i İslâmbol’da Topkapısı dâhilinde Kürkçübaşı mahallesinde sâkinler işbu bâ‘iseyü’l-kitâb Osman Ağa ve Ali Ağa ibney İsmail nâm karındaşlar meclis-i şer‘de ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden ve mahalle-i mezbûre ahâlisinden Ali Ağa b. Abdullah ve Abdurrahman Ağa b. Ahmed ve Emîn-i Cev mahallesi sâkinlerinden Çorbacı Mustafa Ağa b. Salih nâm kimesneler li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka sâlifü’z-zikr Kürkçübaşı mahallesinde vâki‘ bir tarafdan sâbıkā Kuds-i şerîf kādısı Kilisî Ali Efendi veresesi menzilleri ve bir tarafdan müstahbirân-ı mezbûrân menzilleri ve bir tarafdan tarîk-i hâs ve bir tarafdan tarîk-i âm ile mahdûd hâriciyede fevkānî bir bâb oda ve tahtında bir ahur ve kenîf ve bir mikdâr havlu ve dâhiliyede iki bâb oda ve bir sagīr oda ve bir sofa ve dehliz ve âbdesthâne ve kenîf ve tahtında bir matbah ve kömürlük ve mahtab ve bi’r-i mâ ve bağçe ve bir mikdâr havluyu müştemil bir bâb mülk menzil müstahbirân-ı mezbûrânın vâlideleri olup bundan akdem vefât eden Rukiye bt. Ali nâm hatunun hayatında ile’l-vefât yedinde mülk ve hakkı ve Türk Ahmed Paşa Vakfı’ndan olup müstahbirân-ı mezbûrânın menzilleri cânibinden iki yüz zirâ‘ mahâlli dahi bâ-temessük-i mütevellî bi’l-icâreteyn taht-ı tasarrufunda olduğu hâlde menzil-i mahdûd-ı mezkûra mezbûre Rukiye Hatun hayatında elli yedi sene bilâ-nizâ‘ mâlike ve mutasarrıfa olup ba‘de vefâtihâ oğulları müstahbirân-ı mezbûrân Osman Ağa ve Ali Ağa’ya mevrûs ve müntakil olmağın ol-vechile menzil-i mahdûd-ı mezkûr müstahbirân-ı mezbûrân Osman Ağa ve Ali Ağa’nın vâlideleri müteveffât-ı mezbûre Rukiye Hatun’dan müntakil bi’l-münâsafa mülk-i mevrûsları olup menzil-i mahdûd-ı mezkûrun müstahbirân-ı mezbûrândan gayrı müstahıkk-ı âharı olduğu ma‘lûmumuz değildir deyü herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî-selhi Muharrem sene 1197 Şühûdü’l-hâl: İmâm vekîli Hafız Mustafa b. Hüseyin, Molla Ali b. Halil, Ali Ağa b. Abdullah, Hasan Ağa b. Abdullah, Abdurrahman Ağa b. Ahmed, Çorbacı Halil Ağa b. Abdullah, Mehmed Ağa b. Abdullah Çukadâr-ı sadrazam.