Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 210 Hüküm no: 188 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Osman Ağa ve Ali Ağa kardeşlerin ortak oldukları evlerini Ahmed Çavuş Ağa’ya satmaları Menzil mübâya‘ası Mahmiye-i İslâmbol’da Topkapısı dâhilinde Kürkçübaşı mahallesinde sâkinler Osman Ağa ve Ali Ağa ibney ( ) nâm kimesneler meclis-i şer‘-i şerîf-i enverde işbu bâ‘isü’l-kitâb Ahmed Çavuş Ağa b. Süleyman tarafından vech-i âtî üzere tasdîka vekîl olduğu ber-nehc-i şer‘î sâbit olan Mustafa Ağa b. Salih mahzarında herbiri ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye bi’l-münâsafa yedimizde mülk ve hakkımız olup mahalle-i mezbûrede vâki‘ bir tarafdan sâbıkā Kuds-i şerîf kādısı Kilisî Ali Efendi veresesi menzili ve bir tarafdan bizim âhar menzilimiz ve bir tarafdan tarîk-i hâs ve bir tarafdan tarîk-i âm ile mahdûd hâriciyede fevkānî bir bâb oda ve tahtında bir ahur ve kenîf ve bir mikdâr havlu ve dâhiliyede fevkānî iki bâb oda ve bir sagīr oda ve bir sofa ve dehliz ve âbdesthâne ve kenîf ve tahtında bir matbah ve kömürlük ve mahtab ve bi’r-i mâ ve bağçe ve bir mikdâr havluyu müştemil bir bâb mülk menzilimizi bi-cümleti’t-tevâbi‘ ve’l-levâhık ve kâffetü’l-hukūk tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile müvekkil-i mezbûr Ahmed Çavuş Ağa’ya bin dört yüz elli guruşa bey‘ ve temlik ve teslîm ve yine bi’l-münâsafa taht-ı tasarrufumuzda olup Türk Ahmed Paşa Vakfı’ndan bizim menzilimiz cânibinden iki yüz zirâ‘ mahâllini dahi iki yüz elli guruş bedel mukābelesinde müvekkil-i mezbûr Ahmed Çavuş Ağa’ya bâ-ma‘rifet-i mütevellî ferâğ-ı mu‘teber-i kat‘î ile ferâğ ve tefvîz eylediğimizde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semen-i merkūm bin dört yüz elli guruş ve bedel-i mezkûr iki yüz elli guruş ki cem‘an bin yedi yüz guruşu müvekkil-i mezbûr Ahmed Çavuş Ağa yedinden bi’l-münâsafa tamamen ahz ü kabz eyledik, ba‘de’l-yevm menzil-i mahdûd-ı mezkûrun mülk olan mahâlli müvekkil-i mezbûr Ahmed Çavuş Ağa’nın mülk-i müşterâsı ve vakıf olan mahâlli dahi dâhil-i havza-i tasarrufu olup bizim kat‘a alâka ve medhalimiz kalmamışdır dediklerinde gıbbe’t-tasdîki’ş-şer‘î mâ-vaka‘a. Fî-gurrei Saferi’l-hayr sene 1197 Şühûdü’l-hâl: Şâhidûn-ı [sâbıkūn].