Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 211 Hüküm no: 189 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden vefat eden Ali b. Ahmed’in vârislerinin terekeden hisselerini alarak birbirlerinin zimmetlerini ibra etmeleri Mîrâsdan ibrâ Mahmiye-i İslâmbol’da Koca Mustafa Paşa kurbünde Bâzergân mahallesinde sâkin iken bundan akdem vefât eden el-Hâc Ali b. Ahmed’in verâseti zevce-i metrûkesi Ümmügülsüm bt. Mustafa nâm hatun ile zevce-i uhrâsından mütevellid sulbî kebîr oğlu Mehmed Emin Ağa’ya münhasıra ve terekesinin sümünü zevcesi mezbûre Ümmügülsüm Hatun’a ve seb‘a-i esmânı oğlu mezbûr Mehmed Emin Ağa’ya isâbeti lede’ş-şer‘i’l-enver zâhir oldukdan sonra zâtı vech-i şer‘î üzere mu‘arrefe olan mezbûre Ümmügülsüm Hatun meclis-i şer‘-i şerîf-i enverde tereke-i müteveffâ-yı mezbûra bi’l-verâse vâzı‘ü’l-yed olan üveyi oğlu işbu bâ‘isü’l-vesîka mezbûr Mehmed Emin Ağa mahzarında bi’l-verâse ikrâr ve takrîr-i kelâm edip zevcim mûrisim müteveffâ-yı mezbûrun hîn-i vefâtında yanında mevcûd bi’l-cümle terekesi esmânından hâsıl ba‘de ihrâci’l-mesârifi’l-lâzıme ve’d-düyûn sahhu’l-bâkī beş yüz seksen guruşuna oğlu mezbûr Mehmed Emin Ağa vâzı‘ü’l-yed olmağla zevcim mûrisim mezbûrun zimmetinde ma‘kūdun-aleyh olan otuz guruş mehr-i müeccelim ile meblağ-ı mezbûr beş yüz seksen guruşdan i‘tibâr-ı mezkûr üzere bana isâbet eden hisse-i irsiye-i ma‘lûmemi mezbûr Mehmed Emin Ağa bana def‘ ve teslîm eyledikde ben dahi ber-vech-i muharrer yedinden tamamen ahz ü kabz ve istifâ-yı hak edip zevcim mûrisim müteveffâ-yı mezbûrun kalîl ve kesîr ve celîl ve hakīr bi’l-cümle ism-i mâl ıtlâk olunur terekesine ve mehr-i müeccelime ve bi’l-cümle hukūk-ı mîrâsa ve sâire müte‘allika âmme-i de‘âvî ve kâffe-i mutâlebât ve eymân ve muhâsamâtdan mezbûr Mehmed Emin Ağa’nın zimmetini ibrâ ve ıskāt eylediğimde ol dahi kezâlik hukūk-ı mîrâsa ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 2 min-Saferi’l-hayr sene 1197 Şühûdü’l-hâl: Hafız Mehmed Salim Efendi b. Hafız Hüseyin Efendi, Hüseyin Efendi b. İbrahim Efendi, Hacı Hasan b. Osman, Molla Ali b. Halil, Ali Ağa b. Mehmed, Mustafa b. Mustafa, Salih b. Halil.